नर्वे पहिलोपटक विश्वकपको क्वाटरफाइनलमा, ब्राजिल बाहिरियो

अर्लिङ हालान्डले खेलको अन्तिम समयमा दुई गोल गरेपछि ब्राजिललाई २-१ ले स्तब्ध पार्दै नर्वे पहिलो पटक विश्वकपको क्वार्टरफाइनलमा प्रवेश गरेको छ। यस हारसँगै पाँच पटकको च्याम्पियन ब्राजिल सन् १९९० पछि पहिलो पटक प्रतियोगिताबाट यति चाँडै (अन्तिम १६ बाटै) बाहिरिएको छ।

आइतबार न्युयोर्क न्यु जर्सी स्टेडियममा नर्वेका गोलकिपर ओर्जन निल्यान्डले सनसनीपूर्ण प्रदर्शन गरे। उनले पहिलो हाफमा ब्रुनो गुइमारेसको पेनाल्टी बचाएका थिए। त्यसपछि खेलको अन्तिम ११ मिनेटमा हालान्डले दुई गोल गर्दै ब्राजिललाई निराश पारे।

ब्राजिलका लागि खेलको अतिरिक्त समयमा नेयमारले पेनाल्टीमार्फत एक गोल फर्काएका थिए।

यस खेलको दुई गोलसँगै हालान्डले जारी प्रतियोगितामा लियोनल मेस्सीको ७ गोलको बराबरी गरेका छन्। नर्वेले अब जुलाई ११ मा मियामीमा हुने क्वार्टरफाइनलमा सह-आयोजक मेक्सिको वा इङ्गल्याण्डमध्ये एकको सामना गर्नेछ।

२४ वर्षदेखिको विश्वकप खडेरी अन्त्य गर्ने लक्ष्यका साथ कार्लो एन्सेलोटीलाई प्रशिक्षक नियुक्त गरेको ब्राजिलका लागि यो लगातार छैटौँ पटक हो, जहाँ उनीहरू युरोपेली टोलीसँग पराजित भएर बाहिरिएका छन्। यसअघि ब्राजिल ३६ वर्ष पहिले (सन् १९९० मा) क्वार्टरफाइनल पुग्न असफल भएको थियो, जतिबेला उनीहरू चिरपरिचित प्रतिद्वन्द्वी अर्जेन्टिनासँग १-० ले पराजित भएका थिए।

जापान विरुद्धको अघिल्लो खेलमा निर्णायक गोल गरेका आर्सनलका विङ्गर ग्याब्रियल मार्टिनेलीले घाइते लुकास पाक्वेटाको स्थान लिँदै सुरुवाती ११ मा स्थान बनाएका थिए। नर्वेका लागि भने चोटका कारण पछिल्ला दुई खेल गुमाएका बोरुसिया डर्टमन्डका डिफेन्डर जुलियन रायरसनको पुनरागमनले टोलीलाई थप मजबुत बनाएको थियो।

खेलको तेस्रो मिनेटमै प्याट्रिक बर्गले गोल गरे पनि त्यसलाई अफसाइड घोषित गरियो। केही समयपछि क्रिस्टोफर एजरले बक्सभित्र म्याथियस कुन्हालाई लडाएपछि ब्राजिलले पेनाल्टी पायो। रेफ्री इस्माइल एल्फाथले सुरुमा पेनाल्टीको अपिल अस्वीकार गरे पनि भिएआरको हस्तक्षेपपछि निर्णय उल्ट्याइएको थियो। तर गुइमारेसको कमजोर पेनाल्टी प्रहारलाई निल्यान्डले उत्कृष्ट बचाउ गरे।

निल्यान्डले पुन: मार्टिनेलीको प्रहारलाई बचाउँदै ब्राजिललाई अग्रता लिनबाट रोके। मार्टिन ओडेगार्डले आफ्नो डिबक्स नजिकै बल गुमाउँदा भिनिसियस जुनियरले प्रहार गरेको बललाई पनि निल्यान्डले खुट्टाको सहयोगमा रोकेका थिए।

हालान्डले पहिलो हाफमा खासै प्रभाव जमाउन नसके पनि उनको शारीरिक शक्तिका कारण ओडेगार्डले गोल गर्ने सुवर्ण मौका पाएका थिए, तर एलिसनले त्यसलाई बचाए।

दोस्रो हाफमा नर्वेले ओस्कार बब र एन्ड्रियास स्जेल्ड्रुपलाई मैदान छिरायो। ब्राजिलका युवा खेलाडी एन्ड्रिक मैदान प्रवेश गरेलगत्तै गोलको नजिक पुगेका थिए, तर निल्यान्डले चतुराईपूर्वक उनलाई गोल गर्न दिएनन्।

अन्ततः स्जेल्ड्रुपले देब्रेतर्फबाट दिएको क्रसमा हालान्डले ग्याब्रियलभन्दा माथि उफ्रिएर उत्कृष्ट हेडरमार्फत गोल गर्दै नर्वेलाई अग्रता दिलाए। ब्राजिलले बराबरीका लागि निकै संघर्ष गरे पनि निल्यान्डको उत्कृष्ट बचाउहरूले नर्वेको संकट टारे।

९०औँ मिनेटमा हालान्डले डिबक्सको छेउबाट भुइँतर्फ प्रहार गरेको बल सिधै गोलमा परिणत भएपछि नर्वे २-० ले अगाडि बढ्यो। इन्जुरी समयको १०औँ मिनेटमा नेयमारले पेनाल्टीमार्फत एक गोल फर्काए पनि नर्वेको ऐतिहासिक जित रोक्न त्यो पर्याप्त भएन। पेनाल्टी प्रहार गर्नुअघि नेयमार र निल्यान्डबीच केही भनाभन समेत भएको थियो।