प्रधानमन्त्री शाहले ऊर्जा उद्यमीसँग गरे छलफल, ४७ बुँदे सुझाव पेस

काठमाडौँ: प्रधानमन्त्री वालेन्द्र शाह (बालेन) ले ऊर्जा क्षेत्रका निजी लगानीकर्तासँग प्रत्यक्ष संवाद गर्दै विद्युत क्षेत्रका नीतिगत सुधारसम्बन्धी विषयमा सरकार खुला रहेको संकेत दिएका छन्। सरकार गठनको सय दिन पूरा भएपछि प्रधानमन्त्री शाहले निजी क्षेत्रसँगको संवादलाई तीव्र बनाएका छन्।

प्रधानमन्त्री तथा मन्त्रिपरिषद्को कार्यालयमा शुक्रबार भएको भेटवार्तामा स्वतन्त्र ऊर्जा उत्पादकहरूको संस्था, नेपाल (इप्पान) का पदाधिकारीले ऊर्जा क्षेत्रका विभिन्न नीतिगत, कानुनी र संरचनागत सुधारसम्बन्धी ४७ बुँदे सुझाव प्रधानमन्त्रीसमक्ष प्रस्तुत गरेका थिए।

छलफलका क्रममा निजी क्षेत्रले विद्युत खरिद सम्झौता (पीपीए) खुलाउनुपर्ने, विद्युत व्यापारमा निजी क्षेत्रलाई प्रवेशको अवसर दिनुपर्ने तथा प्रसारण लाइन निर्माणमा निजी क्षेत्रको सहभागिता सुनिश्चित गर्नुपर्ने विषयलाई प्राथमिकताका साथ उठाएको थियो।

बैठकमा प्रधानमन्त्री शाहले प्रस्तुत गरिएका विषयमा विस्तृत जानकारी लिँदै प्राविधिक, कानुनी र व्यावहारिक पक्षबारे चासो व्यक्त गरेका थिए। विद्युत व्यापारमा निजी क्षेत्रलाई सहभागी गराउने प्रस्तावबारे थप अध्ययन गर्न आवश्यक रहेको उल्लेख गर्दै उनले सम्बन्धित कागजात र आधार सामग्री उपलब्ध गराउन आग्रह गरेको इप्पानले जनाएको छ।

इप्पानका वरिष्ठ उपाध्यक्ष उत्तम भ्लोन लामाका अनुसार प्रधानमन्त्रीले ऊर्जा क्षेत्र सुधारसँग सम्बन्धित प्रस्तावलाई गम्भीरतापूर्वक सुनेका छन् र राज्यको दीर्घकालीन हितलाई केन्द्रमा राखेर निर्णय गर्नुपर्ने धारणा व्यक्त गरेका छन्।

सरकार गठनको सय दिनपछि प्रधानमन्त्री शाहले निजी क्षेत्रसँगको प्रत्यक्ष संवादलाई निरन्तरता दिएका छन्। यसअघि बिहीबार उनले निर्माण व्यवसायीहरूसँग छलफल गरेका थिए भने बुधबार उद्योग तथा व्यवसाय क्षेत्रका छाता संगठनका प्रतिनिधिसँग भेटवार्ता गरेका थिए।