घर–घरका एलपी ग्यास सिलिन्डरको डिजिटल अभिलेख बनाउन संसदीय समितिको सुझाव

काठमाडौँः उद्योग, वाणिज्य तथा श्रम एवं उपभोक्ता हित समितिका सभापति रहबर अन्सारीले देशभरका घरधुरीमा रहेका एलपी ग्यास सिलिन्डरको एकीकृत डिजिटल अभिलेख (डाटाबेस) तयार गर्न सरकारलाई सुझाव दिएका छन्।

बुधबार बसेको समितिको बैठकमा उनले ग्यास आपूर्ति व्यवस्थापनलाई प्रभावकारी, पारदर्शी र सुरक्षित बनाउन घर–घरमा रहेका सिलिन्डरको विवरण समेट्ने डिजिटल प्रणाली आवश्यक रहेको बताए।

अन्सारीका अनुसार हाल राज्यसँग प्रत्येक घरधुरीमा कति वटा ग्यास सिलिन्डर छन् भन्ने आधिकारिक तथ्यांक छैन। यही कारण अनुगमन, आपूर्ति व्यवस्थापन तथा उपभोक्ता सुरक्षासम्बन्धी काम प्रभावकारी रूपमा सञ्चालन गर्न कठिनाइ भइरहेको उनले उल्लेख गरे।

उनले घरधुरीको म्यापिङमा आधारित एकीकृत डिजिटल प्रणाली विकास गरी ग्यास उद्योग, वितरक र नेपाल आयल निगमले समेत कुन घरमा कति सिलिन्डर छन् भन्ने विवरण सहज रूपमा प्राप्त गर्न सक्ने व्यवस्था गर्नुपर्नेमा जोड दिए।

यस्तो प्रणाली कार्यान्वयन गर्न ठूलो चुनौती नरहेको उल्लेख गर्दै उनले वर्तमान सरकारकै कार्यकालमा यसको सुरुवात गर्न आग्रह गरे। उनका अनुसार डिजिटल अभिलेख तयार भएपछि ग्यास वितरण प्रणाली थप व्यवस्थित, पारदर्शी र प्रभावकारी बन्नेछ।

बैठकमा अन्सारीले भारतसँग प्रस्तावित एलपी ग्यास पाइपलाइन परियोजनालाई पनि शीघ्र अघि बढाउन सरकार सक्रिय हुनुपर्ने बताए। भारतले विभिन्न समयमा परियोजनाप्रति सकारात्मक चासो देखाए पनि त्यसलाई कार्यान्वयनको चरणमा पु¥याउन नेपालले कूटनीतिक र प्राविधिक पहल तीव्र बनाउनुपर्ने उनको भनाइ थियो।

उनले भारतसँग समन्वय गरेर पाइपलाइन निर्माणको स्पष्ट समयसीमा, भण्डारण क्षमता र कार्ययोजना सार्वजनिक गर्न सरकारसँग आग्रह गरे। साथै, ग्यास उद्योगहरूको सहकार्यमा हाउजिङ सोसाइटी तथा घना बस्तीमा सामूहिक ग्यास वितरण प्रणाली विस्तार गर्न पनि उनले सुझाव दिए।