प्रधानमन्त्रीलाई सभामुखको रुलिङ: ‘संसद्‌मा उपस्थित भएर प्रश्नको जवाफ दिनू’

प्रतिनिधि सभाका सभामुख डोलप्रसाद अर्यालले प्रधानमन्त्री वालेन्द्र शाह (बालेन) लाई संसद्‌मा उपस्थित भई सांसदहरूले उठाएका प्रश्नको जवाफ दिन ‘रुलिङ’ गरेका छन्। सोमबार बसेको प्रतिनिधि सभाको बैठकको सुरुवातमै विपक्षी दलका सांसदहरूले उभिएर विरोध जनाएपछि सभामुख अर्यालले प्रधानमन्त्रीको नाममा यस्तो निर्देशन जारी गरेका हुन्।

विपक्षी सांसदहरूले लामो समयदेखि प्रधानमन्त्रीसँग प्रत्यक्ष प्रश्नोत्तरको माग गर्दै सदनमा अवरोध गर्दै आएका थिए। सांसदहरूको माग र नियमावलीको व्यवस्थाप्रति ध्यानाकर्षण भएको जनाउँदै सभामुख अर्यालले भने, ‘प्रतिनिधि सभा नियमावलीको नियम ५६, ५७, ५८, ५९ र ६० बमोजिम माननीय सदस्यहरूले उठाउनुभएका महत्त्वपूर्ण विषयमा जवाफ दिन म सम्माननीय प्रधानमन्त्रीलाई निर्देश गर्दछु।’

सभामुखको रुलिङपछि अवरोध गरिरहेका विपक्षी सांसदहरू आफ्नो स्थानमा बसेर सदन सञ्चालन गर्न सहयोग गरेका थिए।

प्रतिनिधि सभा नियमावलीको नियम ५६ मा प्रधानमन्त्रीसँग प्रत्यक्ष प्रश्नोत्तरको बाध्यात्मक व्यवस्था छ। जसअनुसार प्रत्येक महिनाको पहिलो हप्ताको एक दिन पहिलो एक घण्टा प्रधानमन्त्री वा निजको कार्यक्षेत्रसँग सम्बन्धित प्रश्नका लागि निर्धारण गर्नुपर्ने हुन्छ। यदि निर्धारित दिन बैठक बस्न नसकेमा त्यसपछि बस्ने पहिलो बैठकमै यो कार्यक्रम राख्नुपर्ने व्यवस्था भए पनि यसको प्रभावकारी कार्यान्वयन हुन सकेको थिएन।