नेदरल्यान्ड्ससँग हारेर बाहिरियो नेपाल

काठमाडौं – नेदरल्यान्ड्ससँग हार बेहोरेसँगै आईसीसी विश्वकपको ग्लोबल छनोटको पहिलो चरणबाटै नेपाल बाहिरिएको छ। सुपर सिक्समा पुग्ने लक्ष्य राखेको भए पनि नेपालले नेदरल्यान्ड्ससँग ७ विकेटको हार बेहोरेर छनोटको पहिलो चरणबाटै बाहिरिएको हो। यता नेदरल्यान्ड्स भने सुपर सिक्समा पुगेको छ। उसले नेपाल र अमेरिकालाई हराएर सुपर सिक्सको यात्रा तय गरेको हो।

छनोटको पहिलो चरणमा खेलेका चारमध्ये नेपालले एक खेलमा मात्र जित निकाल्न सक्यो। पहिलो खेलमा नेपालले आयोजक जिम्बावेसँग ८ विकेटको हार बेहोरेको थियो। त्यसपछि अमेरिकालाई ६ विकेटले हराएको थियो।

तेस्रो खेलमा त नेपालले निकै ठूलो हार बेहोर्यो। दुई पटकको विश्व विजेता वेस्ट इन्डिजसँग नेपालले १०१ रनको हार बेहोरेको थियो। दुई हार बेहोरिसकेपछि नेपाललाई अन्तिम ६ मा पुग्नका लागि नेदरल्यान्ड्सविरुद्ध जितको विकल्प थिएन।

तर नेपालले दिएको १६८ रनको लक्ष्य नेदरल्यान्ड्सले तीन विकेटको क्षतिमा २७ ओभर एक बलमा पुरा गरेपछि नेपाल हार स्विकार्न बाध्य भएको हो।

कमजोर ब्याटिङ गरेको नेपालको हारको कारण बलिङमा राम्रो सुरुआत नभएर पनि हो। किनभने १६८ रनको मात्र लक्ष्य दिएको नेपालविरुद्ध ओपनिङ जोडीले नै १३ ओभर खेलेर ८६ रन बनाएको थियो। जबकी नेपालले ८६ रन बनाउँदा चार विकेट गुमाइसकेको थियो।

नेपालले ढिलै भए पनि ओपनिङ साभेदारी तोडेको सन्दीपको बलमा मात्र हो। बलर सन्दीपले ४३ बल खेलेका ओपनर विक्रमजित सिंहलाई ३० रनमा आउट गराए।

सन्दीपकै हातबाट नेदरल्यान्ड्का वाइजले वारासी दुई रनमै आउट भएका थिए। वारासीलाई सन्दीपको बलमा दिपेन्द्र सिंह ऐरीले क्याचआउट गरेका थिए।

ओपनर म्याक्स ओवुड एक्लैले आठ चौका र छ छक्काको सहयोगमा ९० रन जोडेका थिए। उनले नै स्कोलाई १५८ रनसम्म पुर्याएका थिए। अन्तिममा उनी गुल्सन झाको सिकार भए। यि तीनबाहेक नेपाली बलरले बाँकी खेलाडी आउट गर्न सकेनन्।

विक्रमाजितले ३० रन, बारेसीले तीन रन बनाएर आउट भए। अविजित रहेका बास ड लिडले ४१ रन तथा तेजाले २ रन बनाएका थिए।

खेलको पहिलो पारी सकिएसँगै सुरुआतमा ब्याटिङ गरेको नेपालले १६८ रनको लक्ष्य प्रस्तुत गरेको थियो। खेलमा राम्रो प्रदर्शन गर्न खोजे पनि नेपालले लगातार विकेट गुमाइरह्यो।

नेपाका लागि कप्तान रोहित कुमार पौडेलले सर्वाधिक ३३ रन बनाए। ३३ रन बनाउनका लागि पनि उनले ५५ बल खर्च गर्नुपर्यो। सुरुआतबाटै किफयाति देखिएका नेदरल्यान्ड्सका बलर उत्तिकै घातक सावित भए।

नेपालले खेलको तेस्रो ओभरमै दोस्रो विकेट गुमाएयो। ओपनर आसिफ शेख पहिलो विकेटका रुपमा आउट भएको १२ ओभर पछि नेपालले दोस्रो विकेटका रुपमा कुशल भुर्तेललाई गुमाएको थियो।

ओपनर कुशलले ४२ बलमा २७ रन मात्र बनाउन सके। विक्रमजित सिंहले एडवार्डको हातबाट क्याचआउट गराएपछि नेपालको खातामा ४६ रन मात्र थियो। उनी १४ ओभर पाँच बलमा आउट भएका हुन्।

फाइल तस्बिर।

कुशलअघि खेलमा दुई बल मात्र सामना गर्न पाएका आसिफ आउट भएका थिए। आसिफ आउट हुँदा नेपालको खातामा सात रन थियो। उनलाई भान बिकले तेस्रो ओभरको दोस्रो बलमा पवेलियन फर्काएका थिए।

छनोटको समूह चरणको अन्तिम खेलमा नेपालले अनिवार्य जितको आवश्यकता भए पनि नेपाले दबाबमा खेल्न सकेन। किनभने त्यसपछिका ब्याटरहरु पनि धमाधम डगआउट फर्किने थाले।

भीम सार्कीले त खेलमा सबैभन्दा धेरै डट बलको सामना गरे। मैदानमा टिक्ने स्वभावदेखाए पनि उनी ५६ बल खेलेर २२ रन बनाउँदै मैदान छोडे। उनलाई फ्योडको बलमा शरिज अहमदले क्याचआउट गराएका थिए।

भीम आउट हुनुपूर्व नै ६ रन बनाएका आरिफ शेखले पवेलियनको बाटो देखिसकेका थिए। आरिफलाई आउट गर्ने विक्रमजित नै थिए। त्यो उनको दोस्रो विकेट रह्यो।

आरिफ आउट हुँदा ५४ रन बनाएको नेपालले ६६ रन बनाउँदा चार विकेट गुमायो। त्यसपछि कुशल मल्ल र कप्तान रोहित पौडेलको जोडीलाई केही समय टिक्ने आशा गरिएको थियो। तर उनीहरुको साझेदारी पनि जम्न सकेन।

९१ रन बनाउँदै कुशल मल्ल डिपार्ट भए। १२ रन बनाएका ब्याटर मल्ल पाँचौ विकेटका रुपमा आउट भएका हुन्। उनलाई आर्यन दत्तले पवेलियन फर्काएका हुन्। रोहित र दिपेन्द्रको साझेदारी पनि जम्न सकेन। रोहित पौडेल ३३ रन बनाएर आउट भइहाले भने दिपेन्द्रले पनि १४ रन मात्र बनाउन सके।

रोहित र दिपेन्द्रलाई भान विकले आउट गराएका थिए। सन्दीपमसँग ३२ रनको साझेदारी गरेर गुल्सन झा पनि पवेलियन फर्किएका थिए। गुल्सनले १५ रन बनाए भने करण केसी त एक रनमै आउट भए। अन्तिममा सन्दीपले २७ रन बनाए।

नेपालविरुद्ध नेदरल्यान्ड्सका लोगन भान विकले ३ विकेट लिए भने बास डि लिड र विक्रमाजितले समान दुईदुई विकेट लिए। त्यस्तै, क्लाटन फ्योड र आर्यन दत्तले पनि समान एकएक विकेट गिराएका थिए।