रसुवा बाढी: ५०० बढी गाडी बगे, सात जलविद्युत आयोजनामा ठूलो क्षति

काठमाडौँ: रसुवामा बुधबार बिहान आएको भीषण बाढीले जिल्लाको भन्सार क्षेत्रदेखि जलविद्युत आयोजनासम्म ठूलो क्षति पुर्‍याएको छ।

प्रारम्भिक विवरणअनुसार रसुवा भन्सारमा रहेका ५०० भन्दा बढी सवारीसाधन बाढीले बगाएको छ। विद्युत उत्पादनसँग जोडिएका कम्तीमा सातवटा जलविद्युत आयोजनामा समेत गम्भीर क्षति पुगेको छ।

रसुवा भन्सार प्रमुख राजेन्द्र ढुंगानाका अनुसार बाढी आउँदा भन्सार परिसरमा करिब ५०० सवारीसाधन थिए। तीमध्ये ठूलो संख्यामा गाडी बाढीले बगाएको उनले बताए। बाढीपछि भन्सार क्षेत्रमा ठूलो भौतिक क्षति भएको र त्यहाँ रहेका अधिकांश संरचना तथा सामग्री सुरक्षित नरहेको उनको भनाइ छ।

भन्सार परिसरमा विभिन्न अटोमोबाइल कम्पनीले चीनबाट ल्याएका नयाँ गाडी राखिएका थिए। बीवाईडी, एमजी, वुलिङ, ओमोडा एन्ड जेको, नामी लगायतका ब्रान्ड रसुवा नाका हुँदै भित्रिने गरेका छन्।

बाढीको जोखिम बढेपछि भन्सारका कर्मचारीलाई सुरक्षित स्थानतर्फ सारिएको छ। उनीहरू हाल भन्सार क्षेत्रभन्दा माथिल्लो जंगल क्षेत्रमा रहेको बताइएको छ।

बाढीको असर जलविद्युत क्षेत्रमा पनि व्यापक देखिएको छ। नेपाल विद्युत प्राधिकरणका अनुसार रसुवागढी, त्रिशूली, देवीघाट, त्रिशूली–३ ‘बी’ लगायतका जलविद्युत आयोजनाका संरचनामा क्षति पुगेको छ। प्रारम्भिक विवरणअनुसार १११ मेगावाटको रसुवागढी जलविद्युत आयोजना, ६० मेगावाटको माथिल्लो त्रिशूली–२ ‘ए’, २४ मेगावाटको त्रिशूली जलविद्युत आयोजना, १४.१ मेगावाटको देवीघाट जलविद्युत आयोजना र ३७ मेगावाटको त्रिशूली–३ ‘बी’ प्रभावित भएका छन्।

यसैगरी २१६ मेगावाट क्षमताको माथिल्लो त्रिशूली आयोजना र ५ मेगावाटको सानो मैलुङ आयोजनामा पनि बाढीबाट क्षति पुगेको छ।

बाढीले २२०/१३२/३३ केभी क्षमताको त्रिशूली–३ ‘बी’ हबअन्तर्गतको सबस्टेसनमा समेत असर गरेको छ। उत्पादन, प्रसारण र वितरणतर्फका संरचनामा क्षति पुगेपछि रसुवा तथा आसपासका केही क्षेत्रमा विद्युत आपूर्ति अवरुद्ध भएको प्राधिकरणले जनाएको छ।

बाढीबाट सडक, पुल, घर तथा अन्य पूर्वाधारमा समेत क्षति पुगेको छ।