भोटेकोशी बाढीको प्रभाव सेयरबजारमा, हाइड्रोपावर र निर्जीवन बीमामा भारी गिरावट

काठमाडौँः भोटेकोशी नदीमा आएको बाढीको प्रभाव सेयरबजारमा समेत देखिएको छ। बाढीका कारण विशेषगरी हाइड्रोपावर तथा निर्जीवन बीमा कम्पनीका सेयरमा भारी गिरावट आएको छ।

बजारमा कारोबार भइरहेका १११ हाइड्रोपावर कम्पनीमध्ये हालसम्म १०८ कम्पनीको सेयर मूल्य घटेको छ। त्यस्तै, सबै निर्जीवन बीमा कम्पनीको सेयर मूल्यमा समेत गिरावट आएको छ। आज सबैभन्दा बढी रसुवागडी हाइड्रोपावरको सेयरमूल्य झण्डै १५ अंकले घटेको छ ।

भोटेकोशीमा आएको बाढीले जलविद्युत् आयोजनामा क्षति पुर्‍याउने जोखिम बढेपछि लगानीकर्तामा त्यसको प्रत्यक्ष प्रभाव परेको देखिन्छ। बाढीका कारण जलविद्युत् कम्पनीको आयोजना तथा भौतिक संरचनामा हुन सक्ने क्षतिलाई लिएर लगानीकर्ता थप सतर्क बनेका छन्।

यता, सम्भावित क्षतिको बीमा दाबी बढ्न सक्ने अनुमानका कारण निर्जीवन बीमा कम्पनीका सेयरमा समेत बिक्री चाप बढेको देखिएको छ।

भोटेकोशी बाढीको प्रभाव र त्यसबाट जलविद्युत् तथा अन्य क्षेत्रमा हुन सक्ने क्षतिको वास्तविक विवरण आउँदै गर्दा सेयरबजारमा यसको प्रभाव थप स्पष्ट हुने देखिएको छ।