बाढीले रसुवा, नुवाकोट र धादिङका ३२ पुल पूर्णरूपले ध्वस्त

काठमाडौँ: रसुवाको भोटेकोशी नदी हुँदै आएको बाढीले सडक सञ्जालमा ठूलो क्षति पुगेको छ।  सडक विभागले सार्वजनिक गरेको पछिल्लो तथ्यांकअनुसार  ३२ वटा पुल पूर्णरूपले ध्वस्त भएका छन् भने ४ वटा पुल क्षतिग्रस्त भएका छन्। रसुवा र नुवाकोटका सबै पुल ध्वस्त हुँदा धादिङ र चितवनका ७ वटा पुल जोगिएका छन्।

विभागका अनुसार  रसुवा जिल्लामा रहेका १३ वटा महत्त्वपूर्ण पुलहरू बाढीले बगाएको छ। चीनसँगको व्यापारिक नाका जोड्ने उत्तरी क्षेत्रको मितेरी पुल (रसुवागढी) पूर्ण रूपमा ध्वस्त भएको छ। यसैगरी, टिमुरेस्थित दुईवटा बेली ब्रिज, भोटेकोशी र चिलिमे खोलामा रहेका स्थायी तथा बेली ब्रिजहरू पनि बाढीले बगाएको छ। स्याफ्रुबेसी र विभिन्न जलविद्युत् आयोजनाका लागि निर्माण गरिएका पुलहरू समेत बाढीको चपेटामा परेका छन्।

नुवाकोटमा बाढीले १५ वटा पुलहरूमा बगाएको छ। बेत्रावतीका पुराना र नयाँ दुवै पुल बाढीले बगाएको छ। यस्तै, त्रिशूली नदीमा रहेका तुप्छे, त्रिशूली बजार (पुरानो र नयाँ), सिमचौर र देवीघाट क्षेत्रका पुलहरू पनि पूर्ण रूपमा ध्वस्त भएका छन्। ताँदी खोलामा रहेका दुईवटा स्थायी पुलहरू पनि बाढीले बगाउँदा यो क्षेत्रको सडक सम्पर्क टुटेको छ।

धादिङ जिल्लामा पनि त्रिशूली नदीमा रहेका पुलहरूमा ठूलो क्षति पुगेको छ। स्यालटार र फुर्के खोलाका पुलहरू पूर्ण रूपमा बगेका छन् भने मटार, कोल्पु खोलाका पुलहरूमा गम्भीर क्षति पुगेको छ।

गल्छी नजिकैको भीमढुङ्गा लामीडाँडा सडक र बेनीघाट क्षेत्रका केही पुलहरू भने जोगिएका छन्। मुग्लिन क्षेत्रमा रहेका आर्च ब्रिज र पुरानो सस्पेन्सन ब्रिज भने सुरक्षित रहेको विवरणमा उल्लेख छ।

बाढीका कारण नुवाकोट, रसुवा र धादिङ जोड्ने पुल बगाउँदा स्थानीयहरूबीच सम्पर्कविच्छेद भएको छ भने चीनसँगको आवतजावत र व्यापार पनि प्रभावित भएको छ।

पूर्णरूपले ध्वस्त पुलहरू

रसुवा 
मितेरी पुल, रसुवागढी
टिमुरे पुल १ (बेली ब्रिज)
टिमुरे पुल २ (बेली ब्रिज)
भोटेकोशी पुल, चिलिमे
चिलिमे पुल, चिलिमे खोला
भोटेकोशी बेली ब्रिज, स्याफ्रुबेसी
स्याफ्रुबेसी पुल (स्थायी)
हाकु-१ बेली ब्रिज, त्रिशूली
हाकु-२ बेली ब्रिज, त्रिशूली
अप्पर त्रिशूली हाइड्रोपावर बेली ब्रिज
मैलुङ बेली ब्रिज, मैलुङ बजार
त्रिशूली नदी पुल, मैलुङ (त्रिशूली ३ए बाँध-१ नजिक)
त्रिशूली नदी पुल, मैलुङ (त्रिशूली ३ए बाँध-२ नजिक)

नुवाकोट जिल्ला 
बोक्टेकोशी नदी पुल, खाल्टे (नुवाकोट-रसुवा सिमाना)
बेत्रावती पुरानो पुल
बेत्रावती नयाँ पुल
त्रिशूली नदी पुल, तुप्छे
त्रिशूली नदी पुल, त्रिशूली बजार (पुरानो)
त्रिशूली नदी पुल, त्रिशूली बजार (नयाँ)
त्रिशूली नदी पुल, सिमचौर
देवीघाट नजिकैको झोलुङ्गे पुल
त्रिशूली नदी पुल, देवीघाट नजिक (मध्यपहाडी राजमार्ग)
ताँदी खोला पुल, देवीघाट
ताँदी खोला पुल, देवीघाट (नयाँ)
त्रिशूली नदी पुल, खड्गभञ्ज्याङ श्रीखाली सडक
त्रिशूली नदी पुल, बुद्धासिंहघाट
त्रिशूली नदी पुल, रातमाटे
त्रिशूली नदी पुल, केउरिनी, फोस्रेटार

धादिङ 
स्यालटार सडक पुल
त्रिशूली नदी पुल, जरेबगैँचा
त्रिशूली नदी पुल, घाटबेसी
त्रिशूली नदी पुल, फुर्के खोला (मलेखु)

क्षतिग्रस्त
त्रिशूली नदी पुल, मटार
कोल्पु खोला पुल (पुरानो)
कोल्पु खोला पुल (नयाँ)

धादिङ र चितवनमा जोगिएका पुल
त्रिशूली नदी पुल, भीमढुङ्गा लामीडाँडा सडक: (स्थान: गल्छी नजिक)
त्रिशूली नदी पुल, बेनीघाट: (बेनीघाट)
त्रिशूली नदी पुल, फिस्लिङ: फिस्लिङ)
त्रिशूली, चुम्लिङटार बेली ब्रिज: (चुम्लिङटार)
मुग्लिन आर्च ब्रिज: (मुग्लिन)
मुग्लिन पुरानो झोलुङ्गे पुल: (मुग्लिन)