धुलिखेल अस्पतालको जनशक्ति ठेक्कामा चलखेल, उजुरीपछि अब के गर्छ प्रशासन?

काभ्रे/धुलिखेल– काठमाडौँ विश्वविद्यालय अन्तर्गत रहेको धुलिखेल अस्पतालको आन्तरिक व्यवस्थापन तथा आपूर्ति सम्बन्धी एक महत्त्वपूर्ण ठेक्का प्रक्रियामा गम्भीर चलखेल भएको आशंका गरिएको छ।

धुलिखेल अस्पताल प्रशासनले हालै सार्वजनिक गरेको बोलपत्र स्वीकृत गर्ने आशयको सूचनामार्फत भेट्रान सेक्युरिटिज ट्रेडिङ्ग्स एन्ड सप्लायर्स प्रालिलाई छनोट गरेपछि यो प्रक्रिया विवादमा तानिएको हो। अस्पतालका लागि जनशक्ति आपूर्तिको ठेक्का प्रतिस्पर्धामा रहेका अन्य स्थापित र न्युनतम् दररेटमा सहभागी कम्पनीलाई पाखा पारेपछि ठेक्का प्रक्रिया विवादित बनेको छ।

‘अस्पतालको जनशक्ति व्यवस्थापन तथा खरिद शाखाको नेतृत्वले भित्रि मिलेमतोमा श्रम ऐनको नियम बमोजिम रहेर न्युनतम् दररेटमा सहभागी योग्य कम्पनीलाई पाखा पारिएपछि यो प्रक्रियाको नियत उदांगो भएको छ’, ठेक्का प्रक्रियामा सहभागी एक कम्पनीका प्रतिनिधिले भने, ‘देशमा सुशासनको अभियान चलिरहेका बेला यस्तो खेलवाडले के सन्देश जाला?’

अस्पताल प्रशासनले सार्वजनिक गरेको आशयपत्र अनुसार भेट्रान सेक्युरिटिज ट्रेडिङ्ग्स एन्ड सप्लायर्स प्रालिको ठेक्का प्रक्रिया विवादित बनेपछि अस्पताल प्रशासन समक्ष अन्य कम्पनीले पुन:मूल्याङ्कनका लागि उजुरी समेत दिएका छन्। प्रशासबाहेक नेपाल सरकारको ‘हेलो नेपाल’मा पनि यसबारे उजुरी परेको छ। यसअघि पनि धुलिखेल अस्पतालको जनशक्ति आपूर्तिको ठेक्का पाएको भेट्रान सेक्युरिटिज ट्रेडिङ्ग्स एन्ड सप्लायर्स प्रालिलाई श्रम ऐन बमोजिम मजदुरहरूलाई सेवा सुविधा नदिएको भन्दै श्रम कार्यालयमा समेत उजुरी परेको थियो।

‘यतिसम्म कि सो कम्पनीले केही उजुरीकर्ताहरूलाई आर्थिक प्रलोभनमा पारेर उजुरी फिर्ता लिन भइरहेको चलखेल पनि सतहमा आइसकेको छ’, ती व्यवसायीले भने, ‘एकातिर विवादित कम्पनी र अर्कोतिर विवादित ठेक्का प्रक्रियालाई अस्पताल प्रशासनले कसरी निरुपण गर्नेछ, त्यो हेर्नुछ।’