डेटा सेन्टरको समस्या समाधान, आजदेखि सेयर कारोबार पुनः सुचारु

काठमाडौँः नेपाल स्टक एक्सचेन्ज (नेप्से) मा देखिएको प्राविधिक समस्या समाधान भएसँगै आज (मंगलबार) देखि सेयर कारोबार पुनः नियमित रूपमा सञ्चालन हुने भएको छ । ७२ वटा कारोबार सदस्य (ब्रोकर) कम्पनीहरूको डेटा सेन्टरका रूपमा रहेको ‘डेटा हब’ मा प्राविधिक समस्या उत्पन्न भएपछि अवरुद्ध बनेको प्रणाली समाधान भएको नेप्सेले जानकारी दिएको हो ।

नेप्सेका अनुसार समस्या समाधान भएसँगै आजदेखि सेयर कारोबार सञ्चालन हुने छ ।

यसअघि ब्रोकर कम्पनीहरूका सर्भर राखिएको डेटा सेन्टरमा प्राविधिक गडबडी आएका कारण सोमबारको सम्पूर्ण नियमित सेयर कारोबार स्थगित गरिएको थियो । प्रणालीमा समस्या यथावत् रहँदा कारोबार गर्दा नेप्सेको मुख्य प्रणालीमा नै असर पर्न सक्ने जोखिम तथा स्टक ब्रोकर एसोसिएसनको आग्रहलाई मध्यनजर गर्दै सोमबार बजार बन्द गरिएको थियो । डेटा हबमा आएको प्राविधिक अवरोध पूर्ण रूपमा हटेको जानकारी प्राप्त भएपछि आजदेखि कारोबार पुनः सामान्य अवस्थामा फर्कने भएको हो ।