रेशमको आममाफी सर्वोच्चबाट सदर

काठमाडौँ: सर्वोच्च अदालतले तत्कालिन सरकारको सिफारिसमा राष्ट्रपतिले रेशम चौधरीलाई दिएको आममाफीको निर्णय सदर गरेको छ। न्यायाधीश शारंगा सुवेदी र श्रीकान्त पौडेलको संयुक्त इजलासले चौधरीको माफीमिनाहा विरुद्ध परेको रिट खारेज गर्दै आममाफी दिने निर्णय सदर गरेको हो।

२०७२ भदौ ७ मा कैलालीको टीकापुर नगरपालिका थरुहट समर्थक प्रदर्शनकारी र प्रहरी बिच दिउँसो झडप हुँदा प्रहरी बरिष्ठ उपरिक्षक सेती अञ्चलका प्रमुख एसएसपी लक्ष्मण न्यौपाने सहित नेपाल प्रहरीका ५ जना तथा सशस्त्रका २ र १ बालक सहित ८ जनाको मृत्यु भएको थियो।

घटनाका प्रमुख योजनाकार चौधरीलाई उक्त मुद्दामा जिल्ला अदालत कैलाली र उच्च अदालत दिपायलले जन्मकैदको सजाय तोकेको थियो । सर्वोच्चले पनि उक्त फैसला सदर गरेको थियो।

तर २०८० जेठ १५ गते गणतन्त्र दिवसको अवसरमा सरकारको सिफारिसमा राष्ट्रपतिले चौधरीलाई आममाफी दिएका थिए।

रेशमले माफी पाएको भोलिपल्ट जेठ १६ गते टीकापुर हत्याकाण्डमा मारिएका प्रहरी निरीक्षक केशव बोहराकी श्रीमती शारदा कडायतले सर्वोच्च अदालतमा रेशमको आममाफीविरुद्ध राष्ट्रपति कार्यालय समेतलाई विपक्षी बनाएर रिट दायर गरेकी थिइन्।