एक्स्ट्रिम म्युजिक सिरिज सुरु, हरेक दुई सातामा नयाँ गीत सार्वजनिक हुने

काठमाडौँ: नेपाली सङ्गीत क्षेत्रमा नयाँ पुस्ताका कलाकार र मौलिक सिर्जनालाई प्रवर्द्धन गर्ने उद्देश्यसहित ‘एक्स्ट्रिम म्युजिक सिरिज’ सुरु भएको छ। ‘नेपाली सङ्गीतमा नयाँ बीट, नयाँ भाइब !’ नारासहित एक्स्ट्रिम इनर्जी ड्रिंकले अक्टोबर १० देखि सुरु गरेको यस सिरिजअन्तर्गत प्रत्येक दुई सातामा एउटा नयाँ मौलिक गीत सार्वजनिक गरिनेछ।

आर्बिट्ररी रेकड्र्सको व्यवस्थापन र एनएफटीपी (नर्थ फ्रम दिस प्लानेट) को निर्माणमा सञ्चालन हुने सिरिजले नयाँ सङ्गीत शैली, नवीन दृश्य प्रस्तुति र सिर्जनात्मक सहकार्यमार्फत नेपाली सङ्गीतमा फरक पहिचान स्थापित गर्ने लक्ष्य राखेको छ। सिरिजका गीत तथा म्युजिक भिडियो ‘एक्स्ट्रिम म्युजिक सिरिज’ को युट्युब च्यानलमार्फत सार्वजनिक गरिनेछ।

सिरिजको पहिलो सिजनमा याबेश, एसटीम्यान, भेक, व्योमा, ब्लुज, बिजेन, फोकटोनिक्स, डोङ र क्रिजेन गरी नौ जना कलाकार सहभागी हुनेछन्। प्रत्येक कलाकारले आफ्नो छुट्टै सङ्गीत शैली र सिर्जनात्मक पहिचानमार्फत सिरिजमा योगदान दिनेछन्।

परम्परागत सङ्गीत शैलीभन्दा फरक प्रयोग, स्वतन्त्र अभिव्यक्ति र नयाँ पुस्ताको सिर्जनशीलतालाई प्राथमिकता दिने उद्देश्यले सिरिज सुरु गरिएको आयोजकले जनाएको छ। यस पहलले नेपाली सङ्गीत क्षेत्रका नयाँ प्रतिभालाई पहिचान दिलाउनुका साथै स्थानीय सङ्गीत संस्कृतिको प्रवर्द्धनमा सहयोग पुग्ने अपेक्षा गरिएको छ।