अमेरिकामा पहिलो पटक अमेरिकी क्षेत्रीय स्वास्थ्य सम्मेलन हुँदै

अमेरिकामा पहिलो पटक अमेरिकी क्षेत्रीय स्वास्थ्य सम्मेलन हुने भएको छ। सम्मेलन एनआरएनएको ग्लोबल हेल्थ कमिटीले आयोजना गर्न लागेको हो। सम्मेलन मे महिनाको २७ र २८ तारिखमा डलासमा हुनेछ। सम्मेलनमा नेपालसहित अमेरिका, क्यानडा लगायतका मुलुकमा रहेका नेपाली मूलका डाक्टर, नर्स र स्वास्थ्य व्यवसायीहरूको सहभागिता रहने छ ।

एनआरएनए ग्लोबल हेल्थ कमिटीका अध्यक्ष डा. सञ्जीव सापकोटाले सम्मेलनमा स्वास्थ्यसँग सम्बन्धी विभिन्न विषयमा छलफल तथा अन्तरक्रिया गरिने बताए । उनका अनुसार सम्मेलनको मुख्य उद्देश्य उत्तर र दक्षिण अमेरिकामा रहेका नेपाली मूलका डाक्टर, नर्स र स्वास्थ्य व्यवसायीलाई एउटै ठाउँमा एकताबद्ध गरी उनीहरूबीचको सञ्जाल बनाउनुरहेको छ ।

सम्मेलनको समापनमा डलास घोषणापत्र जारी गरिनेछ। सम्मेलनमा नेपालबाट प्रमुख वक्ताको रुपमा पाटन स्वास्थ्य विज्ञान प्रतिष्ठानका सह प्राध्यापक एवं वरिष्ठ क्यान्सर रोग विशेषज्ञ डा.अरुण शाहीले सहभागिता जनाउने छन् । सम्मेलनमा कम्तीमा २ हजारभन्दा बढी नेपाली मुलका चिकित्सक र ५ हजारभन्दा बढी नर्सहरूको सहभागिता रहने अपेक्षा गरिएको छ।