कुवेतलाई हराउँदै भारतले जित्यो साफ च्याम्पियनसिपको उपाधि

काठमाडौं – भारतको बैंगलोरमा सम्पन्न साफ च्याम्पियनसिपको फाइनल खेलमा गल्फ टिम कुवेतलाई हराउँदै भारतले उपाधि जितेको छ। १४ औं संस्करणको साफको फाइनल खेलमा भारतले नवौं पटक उपाधि जितेको हो।

फाइनलको निर्धारित ९० मिनेटको खेल बराबरी भएपछि खेल अतिरिक्त समयमा धकेलिएको थियो। तर अतिरिक्त समयमा पनि नतिजा निस्कन सकेन।

त्यसपछि नेपाली रेफ्री प्रज्वल क्षेत्रीले खेललाई पेनाल्टीसम्म पुर्याएका थिए। पेनाल्टीमा भारतले ५–४ को जित निकालेर उपाधि जितेको हो। खेलको १४ औं मिनेटमै शबैश अल खाल्दीले गोल गरेर कुवेतलाई अग्रता दिलाएका थिए।

तर भारतका लल्लियान्जुआमा चेग्तेले खेलको ३८ औं मिनेटमा गोल फर्काएसँगै खेल १–१ को बराबरीमा पुगेको थियो। त्यसपछि खेलमा थप गोल हुन सकेन।

निकै प्रतिस्पर्धात्मक खेलमा गोलका अवसर धेरै सिर्जना भए पनि गोल भने हुन सकेन्। त्यसपछि पेनाल्टी सुटआउटबाट भारतले उपाधि जितेको हो। भारतका लागि पेनाल्टी सुटआउटमा कप्तान सुनील क्षत्री, सन्देश झिंगन, लालिनजुला, शुभाशिष बोस र महेश सिंहले गोल गरे भने उदान्त सिंह गोल गर्न चुकेका थिए। कुवेतका लागि मोहम्मद अब्दुल्लाह सुरुमै गोल असफल भए। साफमा आमन्त्रित टिमका लागि फवाज अलाताबी, अहमद अलधेरी, अल्दुल अजिज र साबिब अल खाल्दीले मात्र गोल गरे का थिए।

भारतले यसअघि सन् १९९३, १९९९, २००५, २००९, २०११, २०१५ र २०२१ को पनि उपाधि जितिसकेको छ। उपाधि विजेता भारतले पुरस्कार स्वरुप ५० हजार अमेरिकी डलर पाएको छ।

यो प्रतियोगितामा भने नेपालले फेयर प्ले ट्रफि जितेको छ।