प्रिमियर कपः उद्घाटन खेलमा नेपाल र मलेसियाको भिडन्त

काठमाडौं- नेपालको त्रिवि क्रिकेट मैदान र मुलपानी मैदानमा आयोजना हुने एसियन प्रिमियर कपको पहिलो खेलमा पाहुना टिम मलेसियाको सामना गर्ने भएको छ।

एसियन क्रिकेट काउन्सिल (एसीसी)ले घोषणा गरेको खेल तालिकाअनुसार उद्घाटन खेलमा नेपालले त्रिवि मैदानमा मलेसियाविरुद्ध खेल्ने तय भएको हो। नेपाल र साउदी अरेबियाविरुद्धको खेल भने मूलपानी मैदानमा हुने छ।

एसीसीले घोषणा गरेको तालिकाअनुसार नेपाल ‘समूह ए’मा छ। यो समूहमा नेपालसँगै ओमन, कतार, मलेसिया र साउदी अरेबिया छन्। नेपालले मूलपानीमा एक मात्र खेल वैशाख ११ गते साउदी अरेबियासँग खेल्नेछ। बाँकी सबै खेल त्रिवि मैदानमा हुनेछन्।

वैशाख ५ गतेबाट १८ गतेसम्म सञ्चालन हुने प्रतियोगिताको ‘समूह बी’मा भने युएई, हङकङ, कुवेत र सिंगापुर छन्। कुल २४ खेलमध्ये १३ खेल त्रिवि मैदानमा हुनेछन् भने बाँकी खेल मूलपानीमा हुनेछन्।

वैशाख १८ गते टियु मैदानमा फाइनल खेलमा जित निकाल्ने टिमले भने सेप्टेम्बरमा हुने एसिया कप खेल्ने अवसर पाउने छ। त्यस्तै सहभागी १० देशमध्ये प्रतियोगिताको शीर्ष तीन टिमले भने एसीसी इमर्जिङ कप खेल्न पाउने छ।

हरेक समूहमा शीर्ष दुई टोली सेमिफइनल पुग्नेछन्। सेमिफाइनलका विजेताले फाइनल खेल्ने छ।