उपनिर्वाचन हुने तीनै क्षेत्रमा उम्मेदवारी दिने रास्वपाको निर्णय

काठमाडौँ- राष्ट्रिय स्वतन्त्र पार्टी (रास्वपा)ले १० वैशाखमा उपनिर्वाचन हुन लागेका तीन वटै प्रतिनिधि सभान निर्वाचन क्षेत्रमा उम्मेदवारी दिने निर्णय गरेको छ। शुक्रबार बसेको केन्द्रीय समिति बैठकले यस्तो निर्णय गरेको हो।

चितवन-२, तनहुँ-१ र बारा-२ मा वैशााख १० गते उपनिर्वाचन हुने निर्वाचन आयोगले तय गरिसकेको छ। गत मंसिर ४ मा भएको निर्वाचनमा पार्टी सभापति रवि लामिछानेको उम्मेदवारी दिने योग्यता नपुगेको भन्दै फैसला गरेको थियो। यद्यपि सर्वोच्चको फैसला आउँदा उनी निर्वाचित भएर गृहमन्त्रीसमेत बनिसकेका थिए।

‘हामीले उपनिर्वाचन हुने तीनवटै क्षेत्रमा उम्मेदवारी दिने निर्णय भएको छ,’ रास्वपका एक नेताले भने।

राष्ट्रपतिमा निर्वाचित भएका रामचन्द्र पौडेल र उपराष्ट्रपतिमा निर्वाचित रामसहायप्रसाद यादव विजयी भएको क्षेत्रमा समेत वैशाख १० मा नै उपनिर्वाचन हुनेछ। यी क्षेत्रमा समेत पार्टीले उम्मेदवारी दिने ती नेताको भनाइ छ। पौडेल तनहुँ-१ र यादव बारा २ बाट प्रतिनिधि सभा सदस्यमा निर्वाचित भएका थिए। राष्ट्रपति र उपराष्ट्रपतिमा निर्वाचित भएसँगै उनीहरु दुवैले सांसद पदबाट राजीनामा दिएका थिए।

सत्ता गठबन्धनका दलले आपसी सहमति गरेर तीनै क्षेत्रमा गठबन्धनका तर्फबाट एक जना मात्र उम्मेदवार खडा गर्ने तयारी गरिरहेका बेला रास्वपाले यस्तो निर्णय गरेको हो। उता जसपाका नेता प्रदीप यादवले भने तीनै क्षेत्रमा गठबन्धनले साझा उम्मेदवार खडा गर्ने विषयमा लगभग सहमति भइसकेको दाबी गरेका छन्।

‘वैशाख १० गते हुने उपनिर्वाचनमा प्रतिनिधि सभाका तीनै निर्वाचन क्षेत्रमा साझा उम्मेवारी खडा गर्ने विषयमा गठबन्धनमा लगभग सहमति छ,’ उनले भने, ‘जसपाले यसअघि विजयी भएको क्षेत्र बारा-२ आफूले पाउनुपर्ने दाबी गरेको छ। यसमा गठबन्धनका सबैजसो घटक सहमत छन्।’

आफ्नो निर्णयमा रास्वपा अडिग रहे सत्ता गठबन्धनबाट साझा उम्मेदवार नहुने लगभग निश्चित देखिएको छ।