भोजपुर गोल्डकपः ट्राइबेकरमा युकेएफसी भारतलाई हराउँदै डाँगीहाट युथ क्लब विजयी

‘छैटौँ अन्तर्राष्ट्रिय आमन्त्रण मेयर भोजपुर गोल्डकप’ प्रतियोगितामा डाँगीहाट युथ क्लब मोरङले युकेएफसी भारतलाई पराजित गरेको छ।

भोजपुर सदरमुकामको स्थानीय टुँडिखेलमा शनिवार भएको खेलमा डाँगीहाट युथ क्लब मोरङले युकेएफसी भारतलाई ट्राइबेकरमा पराजित गरेको हो। निर्धारित समयमा दुवै टोलीले एक–एक गोलको बराबरी खेलेका थिए। त्यसपछि खेलको निर्णय ट्राइबेकरबाट लिइएको थियो। युकेएफसी भारतलाई पराजित गरेको डाँगीहाट युथ क्लब प्रतियोगिताको सेमिफाइनल प्रवेश गरेको छ ।

निर्धारित समयमा युकेएफसी भारतका लागि खेलको २०औँ मिनेटमा बिरेन प्रधानले एक गोल गरेका थिए। विशाल पाण्डेले ७४औँ मिनेटमा गोल डाँगीहाट युथ क्लबलाई खेलमा फर्काएका थिए।

निर्धारित समयमा खेल बराबरी भएपछि समय थप नगरी सिधा ट्राइबेकरबाट निर्णय लिइएको थियो। ट्राइबेकर डाँगीहाट युथ क्लबका विवेक राई, प्रवीण राई, धिरेन विष्ट र सन याक्खाले गोल गर्दा युकेएफसी भारतका पेमा लामा, तुसार विश्वकर्मा र साहिल राईले गोल गरे।

खेलको म्यान अफ द म्याच डाँगीहाट युथ क्लब मोरङका गोलकिपर चरी लिम्बू भएका छन्। शुक्रबार भएको पहिलो खेलमा एनबिवाइसी सप्तरीलाई दुईका विरुद्ध चार गोल गर्दै आयोजक भोजपुर जिल्ला फुटबल संघ सेमिफाइनल प्रवेश गरेको थियो।

प्रतियोगितामा आठ टिमले सहभागिता जनाएका छन् । प्रतियोगितामा युकेएफसी दार्जिलिङ भारत, एभिनियर फुटबल क्लब क्यामरुन, भोजपुर जिल्ला फुटबल संघ, एनबिवाइसी सप्तरी, गोर्खा ब्वाइज रुपन्देही, डाँगीहाट युथ क्लब मोरङ, भगवती स्पोर्टस् क्लब खोटाङ र बसाहा क्लब उदयपुर सहभागी रहेको खेल संयोजक आङपासाङ शेर्पाले जानकारी दिए।

गोल्डकपको मुख्य प्रायोजक रहेको भोजपुर नगरपालिकाले प्रतियोगिता सञ्चालनका लागि २५ लाख सहयोग गरेको छ । करिब ३२ लाख ८० हजारको लागतमा सञ्चालन भएको प्रतियोगिताको विजेताले उपाधिसहित नगद पाँच लाख र उपविजेताले तीन लाख पाउने छन्

आइतबार गोर्खा ब्वाइज रुपन्देही र भगवती स्पोर्टस् क्लब खोटाङका बीचमा प्रतिस्पर्धा हुने आयोजक भोजपुर जिल्ला फुटबल संघका अध्यक्ष प्रवीण सुवालले बताए। प्रतियोगिताको फाइनल १६ गते हुनेछ।