ललितपुर मेयर्स कप : ललितपुर आउट, कोशीले सुदूरपश्चिमलाई हरायो

काठमाडौँ– काठमाडौँमा जारी ललितपुर मेयर्स कप महिला टी–२० क्रिकेट प्रतियोगितामा आयोजक टिमको तर्फबाट सहभागी बनेको ललितपुर मेयर ११ लगातार तस्रो हारसँगै बाहिरिएको छ। त्रिवि मैदानमा भएको खेलमा मधेशसँग एक विकेटले हार खेप्दै ललितपुर प्रतियोगिताबाटै बाहिरिएको हो।

खेलमा मधेशलाई ९७ रनको लक्ष्य दिने क्रममा सोनी पाख्रिनले ३४ रन बनाइन् भने मधेशकी सरस्वती कुमारीले दुई विकेट लिइन्। जवाफमा मधेशकी सरस्वती चौधरीले ३२ रन बनाएर जित दिलाउन सहयोग गरिन्। ललितपुरकी कृतिका मरासिनी र सोनीले समान २–२ विकेट लिएका थिए।

आजै भएको दोस्रो खेलमा भने कोशी प्रदेशले प्रधानमन्त्री कपको विजेता सुदूरपश्चिमलाई ९ विकेटले हराएको छ। सानदार बलिङ गरेको कोशीका रुविना क्षेत्री र अप्सरी बेगमले समान ३–३ विकेट लिएपछि सुदूरपश्चिम टिम ८१ रनमा अलआउट भएको थियो।

खेलमा बिन्दु रावलले ३० रन बनाइन्। त्यस्तै जवाफमा कोशीको काजोल ४० रनमा अविजित रहिन् भने रुबिनाले २८ रन बनाइन्। यो जितसँगै कोशीले तीन खेलबाट ४ अंक बनाएको छ। सुदूरपश्चिमको पनि समान ४ अंक छ।