पत्थरीको अप्रेसन गर्न जाँदा किड्नी नै झिकिदिएपछि…

धनगढी- धनगढीस्थित स्वस्तिक कार्डियो एन्ड मल्टिस्पिसियालिटी हस्पिटल प्रालिमा उपचार गर्न भर्ना भएको एक बिरामीको किड्नी झिकिएको खुलासा भएको छ। कञ्चनपुरको बेलौरी नगरपालिका–१० शिवनगरका ५५ वर्षीय ऐजनलाल चौधरीको पत्थरीको अप्रेसन गर्दा किड्नी नै झिकेर अस्पतालले बदमासी गरेको खुलासा भएको हो।

किड्नी झिकिएपछि बिरामीको आइतबार राति मृत्यु भएको छ। पत्थरीको अप्रेसनका क्रममा मिर्गौलाको नसा काटिएपछि अत्यधिक रक्तश्राव भएको र डाक्टरले फेरि अप्रेसन गरेर बायाँ मिर्गौला नै झिकिदिएको चौधरीका आफन्तले बताएका छन्।

अस्पतालले भने अप्रेसनका क्रममा अत्यधिक रक्तश्राव भएपछि बायाँ मिर्गौला झिक्नु परेको बताएको छ।

चौधरी घरको सिँढीबाट लडेपछि चोट लागेको थियो। उपचारका लागि धनगढी ल्याइएका उनलाई स्वास्थ्य परीक्षणका क्रममा मिर्गौलामा पत्थरी रहेको थाहा भएको भतिजा राजकुमार चौधरीले बताए।

चौधरीको बायाँ मिर्गौलामा दुई वटा र दायाँ मिर्गौलामा एउटा पत्थरी छ भन्दै बायाँ मिर्गौलामा रहेका पत्थरी झिक्न अप्रेसन गरिएको थियो। बिरामीका भतिजा राजकुमार चौधरीका अनुसार दिउँसो ३ बजे अप्रेसन गरिएको थियो। अप्रेसन सफल भएको डाक्टरले बताएका थिए। चिकित्सकले झिकेको पत्थरी पनि देखाएका थिए।

तर ऐजनलाललाई एक घण्टा नबित्दै पेट दुख्न थाल्यो। यसपछि डाक्टरले सुई लगाइदिए। तर निको हुने कुरा भएन। ८ बजेतिर बिरामीलाई धेरै नै अप्ठेरो भयो। त्यसपछि फेरि डाक्टर किड्नीको नसा काटिएको बताए। अत्यधिक रक्तश्राव भइरहेको थियो। बिरामीको ज्यान छान्ने कि किड्नी छान्ने भनेर डाक्टरले भन्न थाले। ‘त्यसपछि बाध्यतावश हामीले किड्नी झिकेर निको हुने भए बरु किड्नी झिक्दिनुस् भन्यौं,’ भतिजा चौधरीले भने, ‘राति २ बजे किड्नी निकाले।’

बिरामीलाई आईसियुमै राखियो। आइतबार ‍झन् अवस्था गम्भीर बन्यो। आइतबार राति अस्पतालका अध्यक्ष महेश जोशीले भनेको कुरा सम्झँदै भतिजा चौधरीले भने, ‘बिरामीको मृत्यु भइसक्यो। कति पैसा चाहिन्छ लिनुस्। हल्ला नगरिदिनुस्।’