सत्ता गठबन्धनको छलफल न्यूनतम साझा कार्यक्रममा केन्द्रित

काठमाडौँ- सत्ता गठबन्धनका १० दलको बैठक आज पनि बस्ने भएको छ। मंगलबार बसेको बैठकमा प्रधानमन्त्री एवम् नेकपा माओवादी केन्द्रका अध्यक्षकले सरकारका न्यूनतम साझा कार्यक्रमको मस्यौदा वितरण गरेकाले त्यसैमा सहमति जुटाउनका लागि बैठक बस्न लागेको बालुवाटार स्रोतले जानकारी दिएको छ। बैठक बिहान नौ बजेका लागि बोलाइएको छ।

मन्त्रालयको भागबन्डा मिलाउन र सरकारको न्यूनतम साझा कार्यक्रमलाई अन्तिम रुप दिन सत्ता गठबन्धनका घटकले पछिल्लो समय बैठक बढाएका छन्।

सत्ता साझेदार दलका नेताले आजको बैठकमा न्यूनतम साझा कार्यक्रममा समावेश गर्नुपर्ने विषयबारे आ-आफ्ना रायसुझाव प्रस्तुत गर्ने छन्। त्यसपछि न्यूनतम साझा कार्यक्रमलाई अन्तिम रुप दिने दलहरुको तयारी छ।

न्यूनतम साझा कार्यक्रम टुंगो लगाएपछि मन्त्रिपरिषद विस्तारका विषयमा छलफल हुनेछ। हिजोको बैठकमा मन्त्रालय बाँडफाटका विषयमा सहमति जुटेको छैन।

हालसम्म नेपाली कांग्रेसले ८ मन्त्रालयमा दाबी छोडेको छैन। प्रतिनिधि सभामा उसका ८८ सांसद छन्। १०-१० सिट रहेका नेकपा एकीकृत समाजवादी र जसपाले तीन-तीन मन्त्रालय पाउनुपर्ने अडान छोडेका छैनन्। प्रतिनिधि सभामा ४ सिट रहेको लोसपाले दुई मन्त्रालयमा दाबी गरेको छ।

साना दलले ठूलो भाग खोज्दा प्रधानमन्त्री पुष्पकमल दाहाललाई सबैलाई सहमत गराउन सकस परेको स्रोतको भनाइ छ। साना दलले ठूलो संख्यामा मन्त्रालयमा दाबी नछाडेपछि प्रधानमन्त्री दाहालले सांसद संख्याका आधारमा मन्त्रालय बाँडफाँट गर्न प्रस्ताव गरेका छन्।