एसिया कपः विश्वविजेता भारतसँग मैदानमा उत्रिँदै नेपाल

काठमाडौं– नेपाल आज एसिया कपअन्तर्गत विश्वविजेता भारतसँग मैदानमा उत्रिँदै छ। अन्तर्राष्ट्रिय क्रिकेट खेल्न थालेको २७ वर्षपछि नेपालले पहिलो पटक विश्वविजेता भारतीय टिमसँग प्रतिस्पर्धा गर्न लागेको हो।

श्रीलंकाको पेल्लेकेले मैदानमा नेपाली समयअनुसार अपराह्न सवा ३ बजे खेल सुरु हुनेछ। प्रतियोगिताको समूह ‘ए’मा रहेको नेपाल र भारतको आजको खेल समूह चरणको अन्तिम हो। दुवै टिमले पहिलो चरणका खेल खेलिइसकेका छन्। पाकिस्तानविरुद्धको पहिलो खेलमा नेपाल फराकिलो अन्तरले हार बेहोरेको थियो। भारत र पाकिस्तानबीच शनिबार भएको खेल वर्षाले रद्द हुँद दुवै टिमले एक–एक अंक जोडेका छन्।

समूहबाट पाकिस्तानले ३ अंक जोडेर सुपर–फोरमा स्थान पक्का गरिसकेको छ। अब नेपाल र भारतबीचको खेलपछि सुपर फोरमा पुग्ने दोस्रो टिमको टुंगो लाग्नेछ। आज विजयी हुने टिम सुपर फोरमा पुग्नेछ। पानी परेर खेल नभए भारत स्वतः सुपर फोरमा पुग्नेछ। यद्यपि आइतबारदेखि नै आज श्रीलंकाको मौसम अदलीबदलीय पानी पर्ने पूर्वानुमान गरिसकिएको छ।

नेपालले पाकिस्तानविरुद्ध खेलको सुरुआतमा उत्कृष्ट प्रदर्शन गरे पनि अन्तिम समय पाकिस्तानी टोलीसामु टिक्न नसक्दा हार बेहोरेको थियो। ब्याटिङमा नेपाली खेलाडीलाई भारतीय तीव्र गतिका बलरको सामना चुनौतीपूर्ण हुनेछ। भारतका तीव्र गतिका बलर जसप्रित बुमराह भने नेपालसँगको खेलमा सहभागी हुने छैनन्।

आजको खेलमा नेपाली टिमका कप्तान रोहित पौडेल, आसिफ शेख, कुशल भुर्तेल, अर्जुन साउद, श्याम ढकाल, ललित राजवंशी, भीम सार्की, कुशल मल्ल, दीपेन्द्रसिंह ऐरी, सन्दीप लामिछाने, करण केसी, गुल्सन झा, आरिफ शेख, सोमपाल कामी, प्रतिश जिसी, किशोर महतो, सन्दीप जोराले भारतीय टोलीसँग प्रतिस्पर्धा गर्नेछन्।

नेपालसँग भारतीय टिमका रोहित शर्मा, श्रीयास ऐयर, शुभमन गिल, सूर्यकुमार यादव, तिलक वर्मा, विराट कोहली, अक्षर पटेल, हार्दिक पाण्ड्या, रविन्द्र जदेजा, इशान किशन, सन्जु सामसन, कुलदिप यादव, मोहम्मद शामी मैदानमा उत्रिनेछन्।

नेपाली टिमको हौसला बढाउन श्रीलंकामा रहेका नेपाली समर्थकका साथै काठमाडौंका मेयर बालेन साह, रास्वपा सभापति रवि लामिछानेलगायतको टोली श्रीलंका पुगिसकेको छ।