पल्लेकेले मैदानमा रोकियो वर्षा, खेल हुन नसके के होला नतिजा?

काठमाडौँ– श्रीलंकाको पल्लेकेले इन्टरनेसनल क्रिकेट मैदानमा भइरहेको नेपाल र भारतबीचको खेलमा वर्षा बाधक बनेको छ। वर्षाका कारण खेल रोकिएको एक घण्टाभन्दा बढी समय भइसकेको छ। स्थानीय समयअनुसार ९:५० बजे वर्षा रोकिएको छ। अब १० मिनेट कुरेर एम्पायरले खेल हुने वा नहुने निर्णय लिनेछन्।

पुनः वर्षा नभएको खण्डमा खेल हुनेछ। पुनः खेल सुरु हुँदा ओभर घट्ने छ। झन्डै पाँच मिनेट बराबर एक ओभर घट्ने गर्दछ। ओभर घट्दा लक्ष्य पनि घट्नेछ। २० ओभरमाथि ओभर घट्ने अनुमान गरिएको छ।

खेलको कट अफ टाइम स्थानीय समयअनुसार १०:२० (नेपाली समय अनुसार राती १०:३५ सम्म) रहेको छ। त्यसबेलासम्म पनि सुरु हुन नकसे खेल रद्द भएको घोषणा एम्पाएरले गर्न सक्नेछन्। त्यसअघि सुरु भएमा २० ओभरमा सीमित हुने सम्भावना छ। २० ओभरमा सीमित भए खेलको लक्ष्य १३० मा झर्नेछ। खेल रद्द भएको अवस्थामा भारत सुपर फोरमा पुग्नेछ।

हालसम्मको अवस्थामा नेपालले दिएको २३१ रनको लक्ष्य भारतले पछ्याइरहेको छ। भारतले २.१ ओभरमा १७ रन बनाउँदा वर्षाको कारण खेल रोकिएको अवस्थामा छ। नेपालले भारतका कुनै पनि विकेट लिन सकेको छैन। शुभमन गिलले ६ बलमा ३ चौकासहित १२ रन बनाएका छन् भने रोहित शर्माले ७ बलमा १ चौकासहित ४ रन बनाएर टिमका लागि १७ रनमा छन्।

नेपालले ४८.२ ओभरमा अलआउट हुँदै उक्त लक्ष्य दिएको हो। भारतविरुद्ध नेपालका ओपनर आसिफ शेखले अर्धशतक बनाएका थिए। आसिफले ८ चौकाको मद्दतमा ५८ रन बनाएका हुन्।

अलराउण्डर सोमपाल कामीले ४८ रन जोडेका थिए। ओपनर कुशल भुर्तेलले ३८ रन जोड्दा दिपेन्द्र सिंह ऐरी २९ र गुल्सन झा २३ रन बनाएर आउट भएका थिए।

सन्दीप लामिछाने ९, भीम सार्की ७, कप्तान रोहितकुमार पौडेल ५ रन बनाउँदा कुशल मल्ल दुई रनमै आउट भए भने करण केसीले २ रन जोडे। बलिङमा भारतका रविन्द्र जडेजा र मोहमद सिराजले ३–३ विकेट लिए। मोहम्मद शामी, पाण्ड्या र शार्दुल ठाकुरको नाममा १–१ विकेट रहयो।