सूर्यबहादुरका छोरा बने राष्ट्रपति रामचन्द्रका राजनीतिक सल्लाहकार

राष्ट्रपति रामचन्द्र पौडेलको राजनीतिक सल्लाहकारमा सुनीलबहादुर थापा नियुक्त भएका छन्। तर, उनको नियुक्ति अहिलेसम्म सार्वजनिक गरिएको छैन। राष्ट्रपतिको कार्यालय स्रोतका अनुसार थापाको नियुक्ति बुधबार भएको हो।

बुधबार नै पौडेलको आर्थिक सल्लाहकार राष्ट्र बैंकका पूर्वगभर्नर डा. चिरञ्जीवी नेपाल नियुक्त भएका थिए। पौडेलले कानुनी सल्लाहकारमा बाबुराम कुँवर नियुक्त गरेका थिए। नेपाल र कुँवरसँगै थापाको पनि नयुक्ति भएको हो। ‘राजनीतिक सल्लाहकारमा थापाको नियुक्ति भइसकेको छ। तर सार्वजनिक मात्रै नगरिएको हो,’ स्रोतले भन्यो।

थापा पूर्वप्रधानमन्त्री सूर्यबहादुर थापाका छोरा हुन्। पूर्वमन्त्री समेत रहेका थापा २०७७ सालमा नेपाली कांग्रेस प्रवेश गरेका थिए। कांग्रेस प्रवेशगरेसँगै सहमहामन्त्री बनेका थापा १४औं महाधिवेशनबाट केन्द्रीय सदस्य निर्वाचित भएका थिए। गत निर्वाचनमा उनलाई कांग्रेसले धनकुटाबाट प्रतिनिधसभाका उम्मेदवार बनाएको थियो। तर उनी एमालेका राजेन्द्र राईसँग पराजित भएका थिए।