‘हामीलाई राउन्डबाटै घिसार्दै लगेर कुटपिट गरियो’

काठमाडौँ-  हेटौँडा उपमहानगरपालिका-१ स्थित सञ्चो अस्पतालमा बुधबार बिहान १० बजे २०/३० जनाको संख्यामा मानिसहरू पुगेका थिए।

उनीहरूको आक्रोश चिकित्सकमाथि थियो। उनीहरू डाक्टर विकास थापा र प्रशान्त बिडारीलाई खोजिरहेका थिए।

थापा-बिडारी दोस्रो तलामा रहेको आइसीयू र एचडीयू वार्डको राउन्डमा थिए।

‘एउटा समूह आएर कुरा गर्नु छ भनिरहेका थिए, हामी राउन्डमा व्यस्त थियौं,’ डाक्टर थापाले भने।

उनीहरू उनीहरू सरासर थापा र बिडारी भएतिर दौडिए।

‘त्यहाँ जाने तीन वटा ढोका छन्, तीमध्ये एउटा ढोका थुने,’ अस्पतालको प्रशासन विभागमा कार्यरत कर्मचारी रोजन कँडेलले भने।

थापाका अनुसार काम गरिरहेको ठाउँबाट दुबैलाई घिस्याएर बाहिर निकाले। त्यसपछि कुटपिट गर्न थाले।

‘हामी दुवै जनालाई काम गरिरहेको ठाउँबाट घिसार्दै लगियो, अनि कुटपिट गर्न थालियो,’ उनले भने।

कुटपिटबाट थापाको गालाको हड्डी भाँचिएको छ। बिडारीको अनुहारमा चोट छ। दुबै आँखाको बाहिरी भाग कालो भएको छ।

कँडेल थप्छन्, ‘उनीहरूले सिधै डाक्टरमाथि कुटपिट गर्न थाले। ढोकामा जो आउँछन् उसलाई कुटपिट गरे।’

चिकित्सकमाथि भकाभक आक्रमण गरेर त्यो समूह हिँड्यो। कोही पनि पक्राउ परेनन्।

चिकित्सक थापा उपचारका लागि बिहीबार काठमाडौं आइपुगेका छन्। बिडारी हेटौंडा छन्।

‘मलाई चाहिँ असुरक्षा महसुस भयो, नेपाल मेडिकल काउन्सिलमा साथीहरू हुनुहुन्छ, त्यहाँ गएर छलफल गर्छु,’ थापाले भने।

चिकित्सक कुटपिटको यो घटना एक बिरामीको मृत्यु प्रकरणसँग जोडिएको छ।

गत साउनको तेस्रो साता हेटौंडा उपमहानगरपालिका-१२ का राजेश प्रधान उक्त अस्पतालमा भर्ना भएका थिए।

थापाका अनुसार साउन २२ गते प्रधान अस्पतालमा भर्ना भएका थिए। परीक्षण गर्दा उनलाई निमोनियाँ र डेंगु दुबै देखिएको थियो।

चिकित्सकले एक दिनपछि (साउन २४ गते) त्यहाँ उपचार नहुने भनी चितवन मेडिकल कलेजमा रिफर गरेका थिए। साउन २५ गते प्रधानको चितवन मेडिकल कलेजमा उपचारको क्रममा मृत्यु भएको थियो।

जिल्ला प्रहरी कार्यालय मकवानपुरका प्रवक्ता प्रहरी नायब उपरीक्षक टेकबहादुर कार्कीका अनुसार उपचारका लापरबाही गरेको भन्दै केही व्यक्तिहरूले डाक्टरमाथि कुटपिट गरेको बताए।

चिकित्सकमाथि कुटपिटमा प्रधानकी श्रीमती, छोरालगायत रहेको उनले बताए।

चिकित्सकले प्रहरीमा निवेदन दिएका छन्। तर, त्यो निवेदन स्वास्थ्यकर्मी तथा स्वास्थ्य संस्था सुरक्षा सम्बन्धी ऐनको पहिलो संशोधन २९७९ को ढाँचामा छैन।

‘उक्त ऐनमा उपचारमा संलग्न चिकित्सकलाई कुटपिट गर्नेहरूलाई कारबाही हुने प्रबन्ध छ,’ कार्कीले भने, ‘उक्त ऐनअनुसार निवेदन लिएर उहाँहरू आएपछि कारबाहीको प्रक्रिया अघि बढ्छ।’

थापाले कुटपिट भएकोबारे कानुनी उपचारमा गइसकेको बताए। ‘म यता आएको छु, बिडारी सर प्रहरीमा जाँदै हुनुहुन्छ, हिजो प्रहरीसँग सल्लाह भएको थियो,’ थापाले भने।