महिना दिनमै बिरौटा नहरमा भेटियो दोस्रो शव

पोखरा- पोखराको बिरौटास्थित फेवा पावरहाउस लगिएको नहरमा एक महिलाको शव फेला परेको छ। स्थानीय पोखरा-१७ निवासी पवित्रा बराल मृत अवस्थामा भेटिएको वडा प्रहरी कार्यालय बैदामका प्रमुख डिएसपी वेदप्रकाश जोशीले जानकारी दिए।

शनिबार दिउँसो बरालको शव भेटिएको हो। ५८ वर्षीया बराल शुक्रबारदेखि घरबाट सम्पर्कविहीन भएकी थिइन्। परिवारले बुटवल जान्छु भनेर भनेको सुनेको र शुक्रबारदेखि नै हराएको भनी सूचना पनि सामाजिक सञ्जालमा प्रवाह गरेका थिए।

प्रहरीका अनुसार यसअघि पनि बराललाई नहरमा बग्दै गरेको अवस्थामा देखेपछि उद्धार गरिएको थियो। पछिल्लो समय उनी अस्वस्थताका कारण आफ्नै सुरमा हिँड्ने गरेको प्रहरीको भनाइ छ।

स्थानीयले ड्यामसाइड नजिकै स्थानबाट मान्छे खसेको जस्तो देखिएको शुक्रबार नै जानकारी दिएपछि हिजो दिउँसैबाट खोजी गरिएको डिएसपी जोशीले जानकारी दिए।

राम मन्दिर नजिकै बैदामको नहरमै यसअघि पनि स्याङ्जाका कर्णबहादुर केसी मृत भेटिएका थिए। गत साउन २६ गते अर्जुन चौपारी २ घर भई हाल काजीपोखरी बस्दै आएका ४४ वर्षीय केसी मृत भेटिएका थिए। स्याङ्जा घर भएका गंगाप्रसाद सुवेदीले २०७३ असोज १ गते यही नहरमा परेर ज्यान गुमाएका थिए।

बिरौटा सडक छेउबाटै सुवेदी बगेका थिए। फेवा ड्यामबाट सुरु हुने यो नहरमार्फत् फेवा पावरहाउसमा पानी लगिएको छ। नहर खुल्ला हुँदा यस्ता घटना हुने गरेका छन्। पोखरामा ठूलो वर्षा हुँदाको समय यो नहरमा सडक सतह बराबर पानी बग्छ। जसले दुर्घटनाको जोखिम बढाएको छ।