एनआरएनएमा बद्री केसीले जितेको घोषणा, मतगणनामा धाँधली भएको भन्दै नारावाजी

निर्वाचन समितिले दिएको जानकारी अनुसार केसीले एक हजार ३७८ मत पाएका छन्।  उनका प्रतिद्वन्द्वीहरू राजेन्द्रकुमार शर्मा आरके (कतार)ले एक हजार २८१ मत, महेशकुमार श्रेष्ठ (जापान)ले एक हजार २२५ मत र रविना थापा (अमेरिका)ले ४७  मत पाए।

उपाध्यक्षमा डा. विनोद श्रेष्ठ (अष्ट्रेलिया), डा.हेमराज शर्मा (यूके), खगेन्द्र न्यौपाने (मलेसिया), राजु रेग्मी (कतार), रामशरण सिंखडा (यूके) र रोविनप्रसाद शेरचन (जापान) निर्वाचित भएका छन्।

युवा उपाध्यक्षमा रोशन थापा (जाम्बिया) दुई हजार ४६८ मतसहित निर्वाचित भए भने महिला उपाध्यक्षमा रोजिना प्रधान राई (यूके) निर्वाचित भएकी छन्।

महासचिवमा गौरीराज जोसी (अमेरिका) निर्वाचित भएका छन्। उनले दुई हजार ३७ मत ल्याए।

काठमाडौंमा भएको महाधिवेसनमा विदेशमा रहेका एनआरएनले अनलाइनबाटै मतदान गर्ने व्यवस्था मिलाइएको थियो।

अध्यक्षका अन्य दुई उम्मेदवार आरके शर्मा र महेश श्रेष्ठले अनलाइन भोटिङ प्रणाली ह्याक गरेर चुनावमा धाँधली गरिएको भन्दै परिणाम अस्वीकार गर्ने घोषणा गरेका छन्।

काठमाडौंबाट झरेको मत शून्य देखिएको भन्दै उम्मेदवारहरुले मत परिणाममाथि शंका गरेको जनाइएको छ। काठमाडौंबाट ८०० भन्दा धेरैले मत खसालेका थिए। उम्मेदवार आफैंले आफैंलाई भोट नहाल्ने अवस्था हुन नसक्ने भन्दै घोषणा गरिएको मत परिणामप्रति पराजित उम्मेदवारहरुले आक्रोश व्यक्त गरेका हुन्।

शर्मा र श्रेष्ठले निर्वाचन परिणामलाई अस्वीकार गर्ने घोषणा गरे। उपाध्यक्षमा जितेका खगेन्द्र न्यौपानेले पनि निर्वाचनमा धाँधली भएको बताए। आफूलाई जिताइएको भए पनि यो जितलाई स्वीकार नगर्ने उनले बताए।