‘आणविक अस्त्रमा भइरहेको खर्च विवेकहीन कार्य हो’

एङ्गोला- राष्ट्रिय सभाका अध्यक्ष गणेशप्रसाद तिमिल्सिनाले ‘आणविक अस्त्रमा भइरहेको खर्च विवेकहीन कार्य भएको टिप्पणी गरेका छन्। एङ्गोलाको लुवाण्डामा आयोजित अन्तर ब्यबस्थापिका संघ (आइपियु)को १४७ औं महासभालाई सम्बोधन गर्दै अध्यक्ष तिमिल्सिनाले आणविक हतियार निर्माण र त्यसको जथाभावी प्रयोग विवेकहिन काम भएको बताएका हुन्।

मानव जातिले शान्ती र न्यायको लागि नभई शक्ति प्राप्तिको लागि मानवजातिकै संहार हुनेगरी सैन्य, सामरिक र आणविक अस्त्रमा सबैभन्दा धेरै खर्च गरेको बिषय जायज हुन नसक्ने उनको धारणा थियो। “विज्ञान र प्रविधिको विकास सुन्दर पृथ्वी र मानवजातिको हित र न्यायका लागि हुनुपर्नेमा क्षणभरमा मानवजाति मात्र हैन पृथ्वीको नै आस्तित्व समाप्त हुनेगरीआणविक अस्त्र निर्माण र प्रयोग भइरहेको छ, जुन विवेकहिन कार्य हो, यो जायज छैन,” उनले भने, “शक्ति सम्पन्न राष्ट्रले गरिब र कमजोर राष्ट्रहरु माथी विभिन्न बहानामा गर्ने आक्रमण थिचोमिचो र दमन शान्ती र न्यायको लागि खतरा बनेको छ। तसर्थ हाम्रा प्रयास यस्ता अस्त्र उत्पादन, प्रयोग र युद्धको लागि सैन्य शक्तिमा गरिने खर्च ठुलो मात्रामा कटौती गरेर न्याय र शान्तीको लागि खर्च गर्ने वातावरण निर्माण गर्ने तर्फ केन्द्रित हुनुपर्छ।”

उनले नेपालको संघीय संसदले दिगो विकास लक्ष्यलाई केन्द्रविन्दुमा राखेर अघि बढेको बताए। उनले संसदमा आउने विधेयकहरूलाई दिगो विकास लक्ष्यको दृष्टिकोणबाट मापन गरेर तिनीहरूको औचित्य परिक्षण हुँदै आएको बताएका हुन्।

तिमिल्सिनाले भने, “दिगो बिकास लक्ष्य हासिल गर्न सरकारले कार्यान्वयन गर्नुपर्ने विषयहरूमा संसदले सरकारलाई निरन्तर खबरदारी गरेको छ। संघीय संसदका दुई सदन मध्येको राष्ट्रिय सभामा दिगो विकास तथा सुशासन समिति गठन गरिएको छ। यो समितिले दिगो विकास लक्ष्यका प्रगति र कार्ययोजनाका अवस्थाबारे तीनै तहका रकारसँग निरन्तर छलफल गर्ने र आवश्यक नीतिगत निर्देशन दिने काम गर्दै आएको छ।”