ढोरपाटन भलिबलको फाइनलमा गण्डकी र एपीएफ

काठमाडौँ- गण्डकी प्रदेश र विभागीय नेपाल एपिएफ क्लब छैटौं ढोरपाटन पुरुष भलिबल च्याम्पियनसिपको फाइनलमा प्रवेश गरेको छ। गण्डकीले पुलिसलाई तथा एपिएफले आर्मीलाई पराजित गर्दै फाइनलमा भिडन्त पक्का गरेको हो।

नयाँ बसपार्कस्थित ढोरपाटन भलिबल प्रशिक्षण केन्द्रको मैदानमा सोमबार भएको दोस्रो सेमिफाइनलमा गण्डकीले विभागीय टोली नेपाल पुलिस क्लबमाथि ३–२ को रोमाञ्चक र प्रतिस्पर्धात्मक जित निकाल्दै फाइनलमा पुग्न सफल भएको हो। गण्डकीले पुलिसलाई २५–२१, २५–१५, २२–२५, २०–२५ र १५–९ ले पराजित गर्यो।

मंगलबारै भएको पहिलो सेमिफाइनलमा एपिएफले आर्मीमाथि १८–२५, २५–२२, २५–२२ र २५–२१ को सेटमा जित निकाल्दै फाइनलमा पुग्न सफल भयो। फाइनल र तेस्रो स्थानको लागि बुधबार प्रतिस्पर्धा हुनेछ।

च्याम्पियनसिपमा ११ टोलीको सहभागिता छ। सहभागी टोलीलाई दुई समूहमा विभाजन गरिएको छ। च्याम्पियनसिपको विजेताले २ लाख ५० हजार, कप र मेडल प्राप्त गर्नेछ।

दोस्रो हुने टोलीले १ लाख २५ हजार, कप र मेडल प्राप्त गर्नेछ। तेस्रो हुनेले ६५ हजार, कप र मेडल प्राप्त गर्नेछ। च्याम्पियनसिपको सर्वोत्कृष्ट खेलाडीले १० हजार रुपैयाँ प्राप्त गर्ने आयोजकले जानकारी दिएको छ।

व्यक्तिगत विधातर्फ स्पाइकर, सेटर, ब्लकर, सर्भर, डिफेन्डर र प्रशिक्षकले समान ५ हजार रुपैयाँ प्राप्त गर्नेछ। प्रशिक्षक प्रशिक्षण गरेका प्रशिक्षकलाई मात्रै उत्कृष्ट प्रशिक्षक प्रदान गरिने आयोजकले जनाएको छ।