भोलिसम्ममा सरकारले शतप्रतिशत पूर्णता पाउँछ : प्रधानमन्त्री दाहाल

काठमाडौँ- प्रधानमन्त्री एवम् नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले आज वा भोलिसम्ममा सरकारले शतप्रतिशत पूर्णता पाउने बताएका छन्।

बुधबार बिहान नेकपा (माओवादी केन्द्र) भूमि व्यवस्था, सहकारी तथा गरिबी निवारण विभागले आयोजना गरेको सहकर्मीहरुको राष्ट्रिय भेलामा बोल्दै प्रधानमन्त्रीले दाहालले यस्तो बताएका हुन्।

‘आज वा भोलिमा सरकारले शतप्रतिशत पूर्णता पाउँछ। यसपछि हामी नीति, कार्यक्रम र बजेटमा केन्द्रित हुन्छौँ,’ प्रधानमन्त्री दाहालले भने, ‘परम्परागत नीति, कार्यक्रम र बजेटले देशका समस्या सम्बोधन गर्न सक्दैन, अर्थतन्त्रका चुनौती पार लगाउन सक्दैन। त्यसैले विगतभन्दा केही नयाँ, विगतभन्दा केही फरक र देशको अर्थतन्त्रमा गुणात्मक प्रभाव राख्ने योजनाहरू ल्याउनुपर्छ। सत्ता समीकरणको चरित्रलाई समेत ध्यान दिँदै केही न केही नयाँ गर्छौं।’

केही नयाँ, फरक र गुणात्मक काम गर्ने बताएका प्रधानमन्त्रीले सरकारले पूर्णता प्राप्त गरिसकेपछि सरकारको सम्पूर्ण ध्यान नयाँ आर्थिक वर्षको नीति, कार्यक्रम र बजेट निर्माणमा केन्द्रित हुने बताए।

‘कठिन परिस्थितिमा सरकारको नेतृत्व गरिरहेको छु। चुनौती नै चुनौतीका बिचसमेत देशका लागि केही गर्न सकिन्छ भन्ने दृढतासहित सरकारको नेतृत्व गरिरहेको छु,’ उनले भने, ‘यसलाई मैले चुनौतीपूर्ण अवसर भनेको छु।’

सहकारी आन्दोलनलाई समाजवादको आधार खडा गर्ने साधनको रुपमा विकसित तुल्याउनुपर्ने बताए। सहकारी आन्दोलनलाई पूँजीवादीकरण हुनबाट रोक्नुपर्नेसमेत उल्लेख गरे।