भूकम्प पीडितलाई डेढ करोड सहयोग गर्ने आइएमई ग्रुपको घोषणा

काठमाडौँ-आइएमई ग्रुपले जाजरकोट भूकम्पबाट पीडितलाई १ करोड ५० लाख रुपैयाँ नगद सहयोग गर्ने भएको छ। राहत वितरणका लागि ग्रुपको संस्थागत सामाजिक उत्तरदायित्व अन्तर्गत उक्त सहयो गर्ने भएको हो।

प्रधानमन्त्री दैवी प्रकोप उद्धार कोषमा उक्त रकम जम्मा गरिने ग्रुपले जानकारी दिएको छ। आइएमई ग्रुप तथा आइएमई फाउन्डेसनले स्थानीय प्रशासनसँगको समन्वयमा राहत प्रदान गर्ने थप कार्यक्रम सञ्चालन समेत गर्ने ग्रुपले जानकारी दिएको छ।

आइएमई ग्रुपका अध्यक्ष चन्द्रप्रसाद ढकालले उद्धार र राहतमा हरसम्भव सहयोगका लागि ग्रुप जुटेको बताए। यसअघिका विपत्तिहरूमा पनि ग्रुप सक्रियतापूर्वक खटेको उनले स्मरण गरे।

शुक्रवार राती कर्णाली प्रदेशको जाजरकोट जिल्लामा केन्द्र विन्दु भई गएको विनाशकारी भूकम्पले जाजरकोट, रुकुम पश्चिम लगायत वरपरका जिल्लामा ठुलो जनधनको क्षति भएको छ ।

ग्रुपमा ग्लोबल आइएमई बैंक, आइजीआई प्रुडेन्सियल इन्स्योरेन्स लिमिटेड, आइएमई लाइफ इन्स्योरेन्स लिमिटेड र आइएमई लिमिटेडलगायत आबद्ध छन्।