८५ लाख बुझाएर अमेरिका पुगेका नेपालीले अध्यागमनकै हिरासतमा अन्तिम सास फेरे

काठमाडौँ- अमेरिकी अध्यागमनको हिरासतमा एक जना नेपाली युवाको मृत्यु भएको छ। सिन्धुपाल्चोकका बाह्रबिसे नगरपालिका–६ का ३२ वर्षीय सुवास श्रेष्ठले टेक्सासको कर्नेस काउन्टी इमिग्रेसन प्रोसेसिङ सेन्टरमा ज्यान गुमाएका हुन्। साढे दुई महिनादेखि अमेरिकाको अध्यागमन हिरासतमा रहेका उनले सोमबार अन्तिम सास फेरेका हुन्।

अमेरिकी इमिग्रेसले उनको मृत्यु भएको बताएको छ। उनको मृत्युको कारण खुलाइएको छैन।

एजेन्टलाई ८५ लाख रुपैयाँ बुझाएर उनी अमेरिका पुगेका थिए। पारिवारिक श्रोतका अनुसार ०८० भदौ ५ गते उनी घरबाट हिँडेका थिए। काठमाडौंबाट टर्की, स्पेन हुँदै मेक्सिको पुगेका थिए।

सेप्टेम्बर २ मा उनी मेक्सिकोबाट अमेरिकाको एरिजोनाको लुकभिल प्रवेश गर्ने क्रममा थिए। उनलाई अमेरिकी अधिकारीले नियन्त्रणमा लिए। हिरासतमै उनको मृत्यु भएको हो। अवैध रुपमा अमेरिका प्रवेश गर्न खोजेको भन्दै उनलाई नेपाल फिर्ता गर्ने तयारी गरिएको थियो।

सिन्धुपाल्चोकका बाह्रबिसे नगरपालिकाका मेयर बालकृष्ण बस्नेतका अनुसार मृतक श्रेष्ठका श्रीमती र दुई सन्तान छन्। प्रमुख बस्नेतका अनुसार शव स्वदेश ल्याउने तयारी भइरहेको बताए।