ए डिभिजन लिग : बाध्यताको फुटबल

काठमाडौँ- यसपालि सहिद स्मारक ए डिभिजन लिगमा नेपाली फुटबलको धेरै कुरामा बाध्यताका उपज हुन्। थ्रीस्टार क्लबका मुख्य प्रशिक्षक मेघराज केसी यसै भन्छन्। उनकै टिममा छन्, भेट्रान खेलाडी विराज महर्जन र विक्रम लामा।

महर्जन र लामा कुनै समय नेपाली राष्ट्रिय फुटबल टिमका नम्बर वान डिफेन्डर हुन्। केसीकै टिममा छन्, भखैरै मैदान टेक्दै गरेका सुन्नी व्यञ्जनकार, प्रताप तामाङ, अस्विन भट्टराई।

‘हामीले खेलाएका कतिपय खलाडीलाई तपाईंहरुले देख्नु पनि भएको थिएन होला, सुन्नु पनि भएको थिएन होला। यो हाम्रो बाध्यता हो,’ प्रशिक्षक केसी भन्छन्।

हिजो मात्र सुन्नीले ८९ मिनेट खेले। युवा खेलाडी आयुष श्रेष्ठले पनि ६१औँ मिनेटमा मैदान प्रवेश गरेर अन्तिम मिनेटसम्म मैदानमा बिताए। तर, उनले गोलका दुई राम्रो अवसर खेर फाले। सायद उनको अनुभव कम भएर हुन सक्छ।

विक्रम लामा

‘हामीले नाम चलेको, स्टार खेलाडीलाई बाहिर राखेर उनीहरुलाई खेलाएको पनि होइन। अघिल्लो सिजनमा लिग खेल्ने ४० देखि ४५ खेलाडी विदेशिएको भन्ने समाचार सुन्छु। हिसाब गर्ने हो ८० खेलाडी मिसिङ छन्,’ बिहीबार च्यासल मैदानमा खेलपछि केसीले सुनाए।

मार्टिन अजयी तिनै खेलाडी हुन्, जो मेघराजको प्रशिक्षणमा खेल्न रुचाउँछन्। पछिल्लो सिजन मेघराज सातदोबाटोमा हुँदा मार्टिन पनि सातदोबाटोमै थिए। यो वर्ष दुवै थ्रीस्टारमा छन्। बिहीबार दिउँसो थ्रीस्टारले बलियो क्लब त्रिभुवन आर्मी क्लबलाई हराउँदा अधिकांश समय बलमा नियन्त्रण बनाएको थियो।

थ्रीस्टारको पछिल्लो खेल हेर्दा त कस्तो देखिन्छ भने मार्टिन अजयी चलेको अवस्थामा उसले जित्छ। नभएर जित कठिन हुन्छ। यसै प्रसंगमा केसी घुमाउरो शैलीमा भन्छन्, ‘हामीले धेरै दुःख गरेर टिम बनाइरहेको हो। हामीले सी डिभिजन पनि नखेलेको खेलाडीलाई ए डिभिजनमा ल्याएर खेलाइरहनु परेको छ। अब देखिने भनेका राम्रो खेलाडी त हो नि! मार्टिन त्यस्तै खेलाडी हुन्। उनले सँधै राम्रो खेल्ने गरेका छन्।’

बिदसिने खेलाडीको लर्कोले घरेलु फुटबलमा असर गरिरहेको विषय नौलो होइन। त्यसैले होला पुराना खेलाडी मैदान फर्किन थालेका छन्। लगातार हार बेहोरिरहेको नेपाल पुलिस क्लबको जुमानु राई लामो समयपछि मैदान फर्किए।

एनआरटीविरुद्ध जुमानु राई मैदान प्रवेश गर्दै गर्दा एनआरटीका प्रशिक्षक राजु काजी शाक्यले पुलिसका प्रशिक्षक भोला सिलवाललाई भनेका थिए, ‘सबै पुराना खेलाडी मैदान पस्दैछन्। म पनि खेलौँ कि के हो?’ उक्त खेलपछि यो कुरा शाक्यले लिगको अवस्था दर्शाउँदै भनेका थिए।

‘हामीले अरु क्लबले छाडेका विक्रम लामा, विराज महर्जन जस्ता खेलाडी ल्याएर मेहेनेत गरिहेका छौं। हामीले उनीहरुकोसम्मान पनि गर्नुपर्छ,’ केसीले भनेका छन्। विराज महर्जन अहिले ३२ वर्षका भए भने विक्रमको उमेर ३४ वर्ष लागिसक्यो। प्रायः नेपाली खेलाडीले यो उमेरमा फुटबल खेल्दैनन्।

खुमलटारविरुद्धको खेलमा थ्रीस्टारका खेलाडी विराज (सेतो जर्सीमा)

तर, नेपाली फुटबललाई खडेरी लागेको समयमा उनीहरुले अझै यो उमेरमा एक पटक नेपाली फुटबल बचाउनु पर्छ भनेर खेलिरहेको भान परेको प्रशिक्षक केसीको ठम्याइ छ।

‘युवा खेलाडीले खेलिरहेको भन्दा त उनीहरुलाई गाह्रो भइरहेको होला नि,’ केसीले भने, ‘र, उनीहरुलाई सम्मान पनि गर्नु पर्छ। उनीहरुको प्रदर्शन त कुनै पनि स्तरमा कम छैन। त्यसको लागि उनीहरुले कस्तो मेहेनेत गरिरहेका होलान। थ्रीस्टारको मात्र नभएर सबै क्लबको समस्या पनि हो, बजारमा खेलाडी नै छैनन्।’

यो कुरा त अहिले लिग हेर्न जाने सबैको मनमा गढेको छ। ‘उमेर र कौशल दुवै भएका खेलाडी खासै छैनन्। अहिले त कस्तो भने फुटबल छोडिसकेका खेलाडी ल्याएर पनि खेलाइरहेका छौं। धेरैजस्तो युवा खलाडीले नै अवसर पाएका छन्,’ केसीले भने्।

केसी नयाँ खेलाडीलाई अनुभवको कमीले गर्दाखेरी गाह्रो भएको उनी बताउँछन्। अहिले थ्रीस्टारमा मेघराजले गरिरहेको पनि त्यहि नै हो। ‘हाम्रो यो केटाहरुले आर्मीलाई यो हिसाबले खेलेर राम्रो नतिजा ल्याउनु भनेको काम गर्ने उत्साह थपिँदै जानु हो। हामी अझै राम्रो गर्दै जानेछौं,’ उनले भने।

अहिले लिगको छैटौं चरण सकिएको छ। अहिलेसम्म पनि क्लबहरुले खेलाडी ट्रायल गरिरहेका छन्। पाँचौ चरणपछिको १५ दिन ग्यापमा मोफसलका विभिन्न प्रतियोगिता खेल्दा पनि क्लबले खेलाडी जाँचमा धेरै समय बिताएका छन्। केसीसँग पनि त्यस्तै अनुभव छ। उनी सुनाउँछन, ‘व्यञ्जनकारले टिममा अभ्यास गरिरहेका थिए। लिगमा अवसर पाएको थिएनन्। मैले मोफसलमा खेलाएर हेरेँ। उसको भविष्य उज्जवल देखिन्छ।’