सरकारले भन्यो- टिकटक चलिरहेको भए खबर गर्नू!

काठमाडौँ- नेपाल दूरसञ्चार प्राधिकरणले अझै पनि टिकटकको प्रयोग भइरहेको भए जानकारी गराउन सूचना जारी गरेको छ। इन्टरनेटको कुनै माध्यमबाट टिकटक खुलिरहेको भए जानकारी गराउन भनेको हो।

‘अझै पनि टिकटकमा पहुँच पुगिरहेको भए वा टिकटक चलिरहेको वा प्रयोग भइरहेको भए प्राधिकरणको इमेल ठेगानामा इमेल गरी त्यस्तो कम्पनीको बारेमा जानकारी गराउनुहुन इन्टरनेट सेवाग्राहीहरुलाई अनुरोध गरिएको छ,’ सूचनामा भनिएको छ।

मन्त्रिपरिषद्को २०८० कात्तिक २७ गतेको बैठकले टिकटकलाई नेपालमा चल्न नदिने निर्णय गरेको थियो।

सामाजिक सद्भाव एवम् सामाजिक वातावरणमा नकारात्मक असर परिरहेकोले नेपालमा टिकटकको प्रयोगमा तत्काल रोक लगाउनुपर्ने बैठकको ठहर थियो।

तर उक्त निर्णय कार्यान्वयन गराउन सरकारलाई धौधौ छ। नेपाल दूरसञ्चार प्राधिकरणले इन्टरनेट सेवा प्रदायकहरू र मोवाइल सेवा प्रदायकहरूलाई निर्देशन दिएपनि टिकटक प्रयोग बन्द हुने संकेत कमजोर छ।

प्राधिकरणको निर्देशनको कार्यान्वयन नगरेको भन्दै प्राधिकरणले पटकपटक सूचना जारी गर्दै आएपनि टिकटकको प्रयोग बन्देज लगाउन सरकारलाई सकस छ।

टिकटक प्रतिबन्ध गरेपछि अभिव्यक्ति स्वतन्त्रतामा हनन भएको भन्दै सर्वोच्चमा १० वटा रिट परेका छन्। ती रिटमाथि सोमबार सुनुवाइ हुने जानकारी सर्वोच्च अदालतले दिएको छ।

उता यसको विरोधमा भइरहेको सामाजिक सञ्जालको विरोध सडकमा पनि देखिन थालेको छ।