ब्राजिलको घरेलु मैदानमा अर्जेन्टिनाको जित

काठमाडौं- फिफा विश्वकप २०२६ अन्तर्गत दक्षिण अमेरिकी महादेशको छनोट खेलमा ब्राजिलमाथि अर्जेन्टिनाले जित हात पारेको छ। चिरप्रतिद्वन्द्वी ब्राजिलको घरेलु मैदानमा अर्जेन्टिनाले १-० जित निकालेको हो।

ब्राजिलको माराकाना रंगशालामा समर्थकबीच झडप हुँदा ढिलो गरी सुरु भएको खेलको पहिलो हाफ गोलरहित बराबरीमा सकिएको थियो।

दोस्रो हाफमा अर्जेन्टिनाले अग्रता लिँदा घरेलु समर्थक स्तब्ध बने। ६३ मिनेटमा निकोलास ओटामेन्डीले गोल गर्दै अर्जेन्टिनालाई अग्रता दिलाए।

खेलको ८१ मिनेटमा ब्राजिल १० खेलाडीमा सीमित बन्यो। ब्राजिलका जोइलिन्टनलाई रेफ्रीले सिधा रातो कार्ड दिएर मैदान बाहिर पठाएका थिए। अर्जेन्टिनाका डि पललाई हातले धकेलेपछि उनलाई रातो कार्ड दिइएको थियो।

जितपछि अर्जेन्टिना शीर्ष स्थानमा छ। अर्जेन्टिनाको ६ खेलबाट १५ अंक छ। दोस्रो स्थानको उरुग्वेको १३ अंक छ। उरुग्वेले आजै बोलिभियालाई ३-० ले हरायो।

यता ब्राजिल भने छैटौं स्थानमा झरेको छ। ब्राजिलको ६ खेलबाट ७ अंक छ। ब्राजिल विश्वकप छनोटको सुरुवाती दुई खेलमा जित निकालेपछिका चार खेलमा जितविहीन छ।

तेस्रो खेलमा भेनेजुएलासँग १-१ गोलको बराबरी खेलेपछि ब्राजिलले विश्वकप छनोटमा लगातार तीन खेलमा हार बेहोरेको छ।

दक्षिण अमेरिकाबाट २०२६ को विश्वकपका लागि ६ टिम सिधा छनोट हुनेछ भने एक टिमले अन्तरमहादेशीय छनोट खेल्न पाउनेछ।

रियो दि जेनेरियोस्थित माराकाना रङ्गशालामा बिहान सवा ६ बजे खेल सुरु हुनुपर्ने भए पनि झडपका कारण खेल आधा घण्टा अवरुद्ध भएको हो।

दुवै टोली मैदानमा उत्रिएर राष्ट्रिय गान सकिए लगत्तै फ्यानहरूबीच कुटाकुट हुँदा रंगशाला केही बेर तनावग्रस्त बनेको थियो।

स्थितिलाई नियन्त्रणमा लिन हम्मेहम्मे परेपछि त्यहाँ खटिएका सुरक्षाकर्मीले लाठी चार्ज गरेका थिए।

समर्थकहरूबीच झगडा हुँदा दर्शक आतंकित बनेका थिए। माहोल शान्त नबनेपछि अर्जेन्टिनाका कप्तान लियोनल मेस्सी आफ्ना खेलाडीसहित मैदानबाट बाहिरिएर ड्रेसिङ रूममा गएका थिए। केही समयमा माहोल शान्त भएर खेल सुरु भएको थियो।