सर्वोत्तमको ‘कट अफ प्राइस’ ४०१ रुपैयाँ, सर्वसाधारणले कतिमा किन्न पाउँछन्?

काठमाडौँ- संस्थागत लगानीकर्ता (क्युआईआई)का लागि सर्वोत्तम सिमेन्टले जारी गरेको प्राथमिक सेयरका लागि ४०१ रुपैयाँ ‘कट अफ प्राइस’ तोकिएको छ। बुक बिल्डिङ विधिमार्फत नेपालमा पहिलो पटक खुलेको सर्वोत्तमको सेयरमा संस्थाहरुलाई बाँडफाँटका क्रममा कटअफ मूल्य ४०१ रुपैयाँ कायम भएको हो।

नेप्से स्रोतका अनुसार कम्पनीको मूल्यमा न्यूनतम ४०१ रुपैयाँदेखि अधिकतम ४०६ रुपैयाँसम्मको मूल्यमा सेयर माग गर्दै संस्थाहरुले आवेदन दिएका थिए। कुल ४१ वटा संस्थाले ३६ लाख कित्ता सेयर माग गरेका थिए।

संस्थाहरुलाई कटअफ मूल्य ४०१ रुपैयाँ कायम भएसँगै सर्वसाधारणलाई कम्पनीको मूल्य प्रतिकित्ता ३६१ रुपैयाँ पर्ने भएको छ। बुकबिल्डिङ निर्देशिकाअनुसार संस्थालाई ‘कट अफ प्राइस’ निर्धारण भइसकेपछि त्यसको १० प्रतिशत मूल्य घटाएर सर्वसाधारणलाई सेयर जारी हुनेछ।

कम्पनीले योग्य संस्थागत लगानीकर्ताका लागि ४०१ रुपैयाँदेखि अधिकतम ६०१.५० पैसाको सीमाभित्र बसेर सेयर खरिदका लागि आवेदन दिन आह्वान गरेको थियो। तर अधिकांश संस्थाहरुले न्यूनतम मूल्यमै बोलपत्रमार्फत प्रस्ताव गरेपछि त्यसको फाइदा सर्वसाधारणलाई पनि हुने देखिएको हो।

कम्पनीको जारीपुँजी ४ अर्ब ६५ करोड रुपैयाँको १२.९०३३ प्रतिशत अर्थात् ६० करोड रुपैयाँ बराबरको कुल ६० लाख कित्ता सेयर बुक बिल्डिङबाट बिक्री गर्न लागेको हो। योमध्ये ४० प्रतिशत अर्थात् २४ लाख कित्ता सेयर योग्य संस्थागत लगानीकर्ता (क्युआईआई)लाई प्रदान हुनेछ। बाँकी ६० प्रतिशत अर्थात ३६ लाख कित्ता सेयर सर्वसाधारणलाई पछि जारी हुनेछ। सर्वसाधारणले ३६१ रुपैयाँमा सेयर किन्न पाउने भएका छन्।