जुम्लामा चिसाेले जनजीवन प्रभावित

जुम्ला- चिसोका कारण जुम्लाको जनजीवन प्रभावित भएको छ। जुम्लाको न्यूनतम तापक्रम माइनसमा झरेसँगै चिसोका कारण जनजीवन प्रभावित भएको हो। 

हावापानी फिल्ड कार्यालय जुम्लाका अनुसार जिल्लाको न्यूनतम तापक्रम २ दशमलव ६ डिग्री र अधिकमत तापक्रम १५ दशमलव ६ डिग्री सेल्सियस रहेको छ।

तापक्रम माइनसमा झरेसँगै बिहानबेलुका घरबाट बाहिर निस्कन कठिन भएको चन्दननाथ नगरपालिका –४ निवासी सरिता न्यौपानेले बताइन्। 

एक सातादेखि बढेको चिसोले जिल्लाको जनजीवन प्रभावित भएको छ। चिसो बढेपछि अस्पतालमा बिरामीको सङ्ख्या पनि बढेको छ। चिसो बढेसँगै रुघाखोकीका बिरामीको चाप बढेको कर्णाली स्वास्थ्य विज्ञान प्रतिष्ठान शिक्षण अस्पतालका निर्देशक पुजन रोकायले बताए।   

जुम्लाका स्वास्थ्य केन्द्रलगायत प्रतिष्ठानमा ज्वरो, रुघाखोकी, दम, ‘कोल्ड डायरिया’का बिरामीको सङ्ख्या बढेका छन्। अहिले दैनिक दुई सयभन्दा बढी बिरामी उपचारका लागि प्रतिष्ठानमा आउने गरेका छन्। 

लगातार बढ्दै गएको जाडोबाट बालबालिका, वृद्ध र सुत्केरी महिला बढी प्रभावित भएका छन्। बालबालिका, वृद्धवृद्धा र सुत्केरी महिलामा रुघाखोकी, ज्वरो, दम, हातगोडा सुनिने, दुख्ने लगायत समस्या देखिएको तिला गाउँपालिकाको रारालिही स्वास्थ्य चौकीमा प्रमुख कमल रावतले बताए।