दोस्रो हारसँगै ओलम्पिक छनोटबाट बाहिरियो नेपाल

काठमाडौं – शनिबार साँझ भियतनामविरुद्ध नेपालले खेलको सात मिनेटमा नै दुई गोलको सामना गरेको थियो। दशरथ रंगशालामा साँझ सम्पन्न ओलम्पिक छनोटको पहिलो चरणको खेलमा दुई गोलले पछि परेको अवस्था नै खेलभरी रह्यो।

नेपालले गोल फर्काउन नसकेपछि ओलम्पिक छनोटको लगातार दाेस्रो खेलमा पनि हार बेहोरेको छ। पहिलो खेलमा ५–१ र दोस्रो खेलमा २–० ले पराजित भएसँगै नेपाल ओलम्पिक छनोटबाट समेत बाहिरियाे। दुई खेलमा नेपालका लागि एकमात्र गोल सावित्रा भण्डारीले पहिलो खेलमा गरिन्। यता, पाहुना टिमले भने समग्रमा सात गोल गरेर छनोटको दोस्रो चरणामा स्थान पक्का गरेको छ।

नेपाली टिमले आज खराब सुरुआत गरे पनि पहिलो खेलको तुलनामा प्रदर्शनमा सुधार गरेको थियो। उसले सातौं मिनेटपछि गोल बेहोरेन। यता पहिलो खेलको तुलनामा आफ्नो गोलकिपिङ र डिफेन्सलाई बलियो बनाएको भियतनामले कुनै गोलकाे सामना गरेन। यद्यपी उसले पछिल्लो खेलको तुलनामा स्कोर तीनले घटायो।

आउँदो फिफा महिला विश्वकपको तयारिमा रहेको भियतनामले खेलको छैटौं र सातौ मिनेटमै गोल गोल गरेको थियो। भियतनामको लागि फाम हाइ एनले खेलको दुई मिनेटको अन्तरालमा नै दुई गोल गरिन्। तर ह्याट्रिकका लागि उनका केही प्रयास असफल रहे।

खेलको सातौं मिनेटमा नै उनले दुई डिफेन्डरलाई बिट गर्दै दोस्रो गोल गरिन्। फाम हाइको नजिकै पुगेकी गोलकिपर एन्जिला तुम्बाप्पो शुब्बाले राम्रो बचाउगर्न नसक्दा नेपालले गोल बेहोरेको हो। त्यसअघि उनले नै कर्नरबाट आएको बललाई दोहोरो प्रहार गर्दै गोल गरेकी थिइन्। पोस्टअघि रहेका डिफेन्डर र गोलकिरले बल नियन्त्रण गर्न नसक्दा नेपालले पहिलो गोल बेहोरेको थियो।

खेलको २८ औं मिनेटमा सावित्राले विपक्षीको पोस्ट नजिकै बल पुर्याए पनि उनलाई भियतनामी डिफेन्डरले गोलका लागि अप्ठ्यारो कोणमा पुर्याएका थिए। उनको प्रहार पोस्टबाहिर गयो।

त्यस्तै, खेलको ३९ औं मिनेटमा गोलकिपर अघि रहेको अवस्थामा चलाखिपूर्ण प्रहार गर्न नसक्दा नेपालगोल फर्काउन चुकेको थियो। नेपालका लागि सावित्रा र दिपा शाहीले अट्याकमा थप राम्रा मुभहरु बनाए पनि गोल गर्न सकेनन्।