घुस लिँदै ट्रायल फेललाई लाइसेन्स दिँदै, कार्यालय प्रमुखसहित ७ जना भ्रष्टाचारी ठहर

गण्डकी- विशेष अदालतले गण्डकी यातायात व्यवस्था कार्यालय, पोखराका तत्कालीन निमित्त कार्यालय प्रमुखसहित सात कर्मचारीले भ्रष्टाचार गरेको ठहर गरेको छ।

अदालतले उक्त कार्यालयको तात्कालीन निमित्त कार्यालय प्रमुख झलक पौडेल शाखा अधिकृतद्वय भरतमणि बराल तथा भरतराज काफ्ले र कम्प्युटर अपरेटरहरु प्रेमप्रसाद श्रेष्ठ, डिल्लीराम बराल, होमनाथ शर्मा र मोहनमणि सुवेदीलाई भ्रष्टाचारी ठहर गरेको हो।

कार्यालय प्रमुख गोकुल शर्मा पौडेल र अधिकृत हरिप्रसाद गौतमले भने सफाई पाएका छन्। लाइसेन्सको परीक्षामा फेल भएकालाई पास गराएर लाइसेन्स बिक्री गरेको भन्दै विशेष अदालतले उनीहरुलाई भ्रष्टाचार मुद्दामा दोषी ठहर गरेको हो।

उनीहरुविरुद्ध गण्डकी प्रदेशबाट ०७५ मंसिर तथा ०७६ को कात्तिक र मंसिरमा सञ्चालित सवारीचालक अनुमतिपत्रको परीक्षा परिणाम फेरबदल गरेको अभियोग सहित अख्तियार दुरुपयोग अनुसन्धान आयोगले २०७८ सालको चैतमा विशेष अदालतमा मुद्दा दायर गरेको थियो।

उनीहरुले २०७५ साल मंसिर र २०७६ साल साउनदेखि मंसिर महिनामा संचालन गरिएको सवारी चालक अनुमतिपत्रको विभिन्न मितिमा लिएको विभिन्न वर्गका प्रयोगात्मक परीक्षामा फेल तथा अनुपस्थित भएका परीक्षार्थीमध्ये १६६ जना परीक्षार्थीहरुलाई पास गराएका थिए।

२०७५ साल मंसिर र २०७६ साल साउनदेखि मंसिर महिनामा सञ्चालन गरिएको सवारी चालक अनुमतिपत्रको योगात्मक परीक्षामा अनुत्तीर्ण तथा अनुपस्थित परीक्षार्थीहरूलाई उत्तीर्ण गर्ने र उत्तीर्ण भएका परीक्षार्थीहरूलाई अनुत्तीर्ण गरी प्रयोगात्मक परीक्षाको परिणाम फेरबदल गर्ने कार्य गरेको अख्तियारले जनाएको छ।