विलियम ओपोकुको ह्याट्रिकसँगै वीरगञ्जले काठमाडौँलाई ४–१ ले हरायो

काठमाडौँ- वीरगञ्ज युनाइटेडले काठमाडौँ रेजर्सलाई पराजित गर्दै नेपाल सुपर लिग (एनएसएल) फुटबल प्रतियोगितामा जित हासिल गरेको छ। 

दशरथ रङ्गशालामा भएको खेलमा वीरगञ्जले काठमाडौँ रेजर्सलाई ४–१ गोलअन्तरले पराजित गर्दै विजयी भएको हो। वीरगञ्जका जितमा विलियम ओपोकुले ह्याट्रिक गरे भने सुनिल खड्काले एक गोल थपे। यता काठमाडौँका लागि भने एनकेन्गुय जुनियरले एक गोल गरे। 

खेलमा पहिलो अग्रता भने काठमाडौँले लियो। खेलको २१औँ मिनेटमा काठमाडौँका जुनियरले कुल्दीप कार्कीको पासलाई सदुपयोग गर्दै गोल गरेका थिए। खेलको पहिलो हाफको अतिरिक्त समयमा वीरगञ्जले पेनाल्टी पायो। सुशील लामाले प्रहार गरेको बल बचाउने क्रममा काठमाडौँका आन्द्रेस नियाले ह्याण्ड गरेपछि वीरगञ्जले पेनाल्टी पाएको थियो।

जसको सदुपयोग वीरगञ्जका विलियम ओपोकुले गरे। त्यस्तै खेलको दोस्रो हाफमा वीरगञ्जले थप तीन गोल गर्‍यो। दोस्रो हाफ सुरु भएको पहिलो मिनेटमै सुनिल खड्काले गोल गर्दै टोलीलाई दोस्रो अग्रता दिलाए। 

त्यसपछि  खेलको ५६ र ५७औँ मिनेटमा ओपोकुले लगातार २ गोल गर्दै ह्याट्रिक पूरा गरे। यस जितसँगै वीरगञ्जले सात खेल खेल्दा ८ अङ्क जोडेको छ। वीरगञ्ज अङ्क तालिकाको छैटौँ स्थानमा उक्लिएको छ।

त्यस्तै पराजित काठमाडौँले सात खेलमा ९ अङ्क जोडेको छ। काठमाडौँ अङ्क तालिकाको ५ स्थानमा छ।