मन्त्री किराँतीले खारेज गरे २५ पर्यटनदूत, कार्यविधि नै फेर्ने निर्णय

काठमाडौँ- संस्कृति, पर्यटन तथा नागरिक उड्डयन मन्त्रालयले २५ पर्यटनदूतको नियुक्ति खारेज गर्ने निर्णय गरेको छ। संस्कृति, पर्यटन तथा नागरिक उड्डयन मन्त्री सुदन किराँतीले निवर्तमान मन्त्री जीवनराम श्रेष्ठले नियुक्त गरेका पर्यटनदूतलाई खारेज गर्ने निर्णय आइतबार गरेका हुन्।

मन्त्रालयले तत्कालीन मन्त्रीको कार्यकालमा बनाइएको पर्यटनदूतसम्बन्धी कार्यविधि पनि खारेज गर्दै नयाँ कार्यविधिसमेत स्वीकृत गरेको  छ। नयाँ कार्यविधिमा पर्यटन दूतको व्यवस्था नै खारेज गरिएको छ। नेपालबाहिर नेपाल चिनाउन अब बिना पारिश्रमिक ‘पर्यटक प्रवर्द्धक’ नियुक्त हुनेछन्। उनीहरूको पदावधि दुई वर्ष तोकिएको छ।

नयाँ कार्यविधिअनुसार अब पर्यटक प्रवर्द्धक बन्नका लागि विदेशमा रहेर पर्यटन सम्बन्धी व्यापारमा कम्तीमा १० वर्ष बिताएको हुनुपर्नेछ। यस्तै नैतिक पतन देखिने फौजदारी अभियोगमा सजाय नपाएको र नेपालप्रति सद्भाव राखी नेपालको पर्यटन, खेलकुद, संस्कृति, कला प्रवर्द्धनमा कम्तीमा १० वर्षदेखि क्रियाशील रहेको हुनुपर्नेछ। यस्तो नियुक्ति गैरआवासीय नेपाली वा विदेशी नागरिकले पनि पाउने सक्ने नयाँ कार्यविधिमा उल्लेख छ। कुनै पनि देशका शरणार्थीले भने यस्तो नियुक्त पाउनेछैनन्।

पर्यटन बोर्डले पर्यटनदूत नियुक्ति गर्ने गरेपनि तत्कालीन पर्यटनमन्त्री जीवनराम श्रेष्ठले बोर्डको अधिकार मन्त्रालयमा तानेका थिए। ‘पर्यटनदूत’ शब्दमा भने परराष्ट्र मन्त्रालयले आपत्ति जनाउँदै आएको थियो।