आफ्ना सांसद घुस प्रकरणमा मुछिएपछि रास्वपाले बोलायो बैठक

काठमाडौँ- राष्ट्रिय स्वतन्त्र पार्टी (रास्वपा)ले अनुशासन आयोगको बैठक बोलाएको छ। मंगलबार बिहान ११ बजेका लागि बैठक बोलाइएको हो। बैठकमा प्रतिनिधिसभा सांसद ढाकाकुमार श्रेष्ठले मेडिकल व्यवसायी दुर्गा प्रसाईंसँग २ करोड रुपैयाँ मागेको अडियो टेपका छलफल हुनेछ।

पार्टी कार्यालय बसुन्धरामा बोलाइएको बैठकले श्रेष्ठबारे निर्णय गरी केन्द्रीय समितिलाई सिफारिस गर्ने बताइएको छ। एमाले, मा‌ओवादी, रास्वपा र राप्रपासहितले पुस १० गते बनाएको गठबन्धनमा रास्वपाले स्वास्थ्य मन्त्रालय पाउने भएको तर त्यसमा जानका लागि अढाई करोड रुपैयाँ पार्टीलाई बुझाउनुपर्ने भन्दै ढाकाले प्रसाईँसँग आग्रह गरेका थिए।

ढाकाको आग्रहपछि तत्कालै एक करोड रुपैयाँ क्यास दिने प्रसाईंले बताएको सार्वजनिक अडियोमा छ। बाँकी रकमका लागि एकदुई दिनभित्रको चेक पनि लिन सकिने ढाकाले बताएका छन्। ढाकाले घुस रकम मागे पनि आफूले उक्त रकम नदिएको प्रसाईंले दाबी गर्दै आएका छन्।

प्रसाईंसँग अढाई करोड घुस रकम माग गरेको अडियो आइतबार सार्वजनिक भएपछि रास्वपाले ढाकालाई रास्वपाले स्पष्टीकरण सोधेको थियो। ढाकाले सोमबार स्पष्टीकरण बुझाइसकेका छन्।

आफूलाई जोडेर आएको अडियो नक्कली भएको ढाकाको दाबी रहँदै आएको छ। अडियो सार्वजनिक भएलगत्तै आइतबार उनले एक विज्ञप्तिमार्फत आफूमाथि षड्यन्त्र भएको दाबी ढाकाले गरेका थिए। उनले यसविरुद्ध कानुनी उपचार खोज्ने जिकिर पनि गरेका थिए।

तर सोमबार उनै ढाकाका भाइ भन्ने व्यक्तिले उनै दुर्गा प्रसाईंसमेतलाई फोन गरी ढाकाको पार्टी सदस्यता पनि नरहने र सांसद पद पनि गुम्ने अवस्थामा पुगेकाले सकारात्मक माहोल बनाउन सहयोग गर्न आग्रह गरेको अर्को अडियो पनि सार्वजनिक भइसकेको छ। दुवै अडिओ कपुरबोट टिभीले सार्वजनिक गरेको हो।

आफूलाई ढाकाको भाइ बताउने व्यक्तिले ९८६०००..४६ नम्बरको मोबाइलबाट सुरुमा दुर्गाका सहयोगी यदु गौतमसँग कुराकानी गरेको सुन्न सकिन्छ। ढाकाका भाइ भनिएका ती व्यक्तिले ढाकाका पक्षमा बोलिदिन दुर्गा प्रसाईंलाई आग्रह गरिदिन भनेको कपुरबोटले सार्वजनिक गरेको अडियोमा सुन्न सकिन्छ।

सोमबार सार्वजनिक अडियोमा दुर्गा प्रसाईसँग पनि ती व्यक्तिले कुराकानी गरेका छन्। मन्त्री बन्नका लागि रकम माग गर्नु ढाकाको गल्ती नभएको बरु पार्टी/पार्टी सभापति रवि लामिछानेको गल्ती भएको प्रसाईंले ढाकाका भाइ भनिएका व्यक्तिसँग बताएको सुन्न सकिन्छ। ढाकाका तर्फबाट प्रसाईलाई फोन गर्ने व्यक्तिले ढाकाले दुर्गालाई भेट गर्न चाहेको बताएका छन्।

आइतबार ढाकाले दुर्गासँग अढाई करोड घुस दिनका लागि रकम माग गरेको अडिओ सार्वजनिक भएको थियो। लामिछानेले आइतबार बाराको गढीमाई मन्दिर नजिकैको चुनावी सभालाई सम्बोधन गर्दै आफूले ७२ घण्टाभित्र छानबिन गर्न निर्देशन दिएको र दुई घण्टा बितेकाले ७० घण्टाभित्रै छानबिन सक्ने बताएका थिए। छानबिन नभए आफूलाई गढीमाईमा नै बली चढाउनसमेत भनेका थिए।

प्रतिनिधि सभाको सोमबार (२७ चैत) को बैठकमा रास्वपाका प्रमुख सचेतक सन्तोष परियारले आफ्नो पार्टीका सांसद रकम बार्गेनिङ प्रकरणमा मुछिएकोमा माफी मागेका थिए।

ढाकामाथि छानबिन गर्ने निर्णय गरेको पार्टीले उनलाई पार्टी र सांसद पदबाट निलम्बन गरेको छ। श्रेष्ठ समानुपातिकतर्फ बाट रास्वपाका सांसद बनेका हुन्। श्रेष्ठलाई रास्वपाले वैशाख १० गते हुने उपचुवाका लागि तनहुँ-१ मा खटाएको थियो। उक्त क्षेत्रमा रास्वपाका तर्फबाट डा स्वर्णिम वाग्ले उम्मेदवार छन्।