सरकारले जनताको शिर झुकाउने काम गरेको छैन : उपप्रधानमन्त्री खड्का

काठमाडौँ-  उपप्रधानमन्त्री तथा रक्षामन्त्री पूर्णबहादुर खड्काले अहिलेको सरकारले जनताको शिर झुकाउने गरी काम नगरेको बताएका छन्।

कांग्रेसका उपसभापतिसमेत रहेका खड्काले कांग्रेस कैलाली क्षेत्र नम्बर १ ले आयोजना गरेको कार्यक्रममा शुक्रबार बोल्दै सरकारले असाध्यै राम्रो काम नगरेको भए पनि मध्यमस्तरको काम भने गरिरहेको बताए।

‘हामीले जनताका लागि कति राम्रो काम गर्न सकेका छौँ, त्यो जनताका बीच छलफल हुनेनै छ,’ उनले भने, ‘सरकारले निकै राम्रो काम गरेको छ पनि भन्दिनँ। तर सरकारले मध्यमस्तरमा रही काम गरेको छ। जनताको शिर झुकाउने गरी कुनै पनि काम गरेको छैन।’

खड्काले आर्थिक स्रोतको अपर्याप्तताका कारणले विकास निर्माणका काम सुस्त भएको बताए। पर्याप्त बजेट नहुँदा चाहेर पनि विकास निर्माणका काम अपेक्षाअनुसार हुन नसकेको उनको भनाइ छ। यद्यपि भएको स्रोतको सदुपयोग गर्दै केही प्रयास भने भइरहेको उनले बताए।

जनता र सेवाग्राहीसँग जोडिएका विषयमा हुने झन्झट, अप्ठ्यारोपन, ढिलासुस्तीले परेको नकारात्मकता हटाउन सरकारले काम गरिरहेको बताएका उनले सरकार सुशासनको अभियानमा रहेको उल्लेख गरेका थिए।

शिक्षा, जलस्रोत, स्वास्थ्य लगायतका क्षेत्रमा भएका विकास कांग्रेसको नेतृत्वमा भएको पनि उनले बताए। कमीकमजोरी सुधार गर्दै जाने बताएका उनले पहिले आफूभित्र भएको कमजोरी सुधार गर्दै पार्टीमा भएका कमजोरी हटाउँदै लैजानुपर्नेमा जोड दिए।