तेस्रो सिजन नफाप्ने माउरिन्होलाई रोमाले किन गर्‍यो बर्खास्त?

काठमाडौँ- क्लबलाई पहिलो यूरोपियन ट्रफी (कन्फ्रेन्स लिग) दिलाएपछि रोमा समर्थकले पुर्तगाली प्रशिक्षक जोसे माउरिन्होको खुब प्रसंशा गरे। तर यो सिजनमा रोमाको प्रदर्शन खराब थियो।

आइतबार राति सानसिरोमा किक-अफ भन्दा पहिला माउरिन्होको आलोचना भएको थियो। जुन आश्चर्यजनक थिएन। उनको टोली एसी मिलानविरुद्ध उत्रिएको थियो। तर रोमाले ३-१ को हार व्यहोर्‍यो। खेलपछि स्ट्राइकर एन्डिया बालोटीले स्वीकार गरे, ‘हामी सबैभन्दा तल्लो स्तरमा पुग्यौँ।’

माउरिन्होले प्रतिक्रिया दिएनन्। अघिल्लो खेलमा रेड कार्ड पाएका कारण उनी टचलाइनमा उपस्थित थिएनन्। तर पनि उनी आलोचनाभन्दा बाहिर रहन सकेनन्। सन् २०२१ मा रोमाको कमान्ड सम्हालेयता पहिलो पटक समर्थकले माउरिन्होको रणनीतिमाथि प्रश्न उठाउन सुरु गरेका थिए।

एक निराश प्रशंसकले लेखे, ‘माउरिन्होले हामीलाई बर्बाद गरिदिए।’

यो निकै भयानक आरोप थियो। यसले रोमामा माउरिन्होको नेतृत्व संकटमा रहेको संकेत गरेको थियो।

रोमाको प्रशिक्षण सम्हाल्न रोम पुग्दा ‘स्पेसल वान’ (माउरिन्हो)लाई भगवानलाई झैं भव्य स्वागत गरिएको थियो। लामो समयदेखि निराशामा बाँचिरहेका समर्थकले माउरिन्होलाई एक रक्षकका रुपमा चित्रित गरे। माउरिन्होले समर्थकको विश्वासलाई तोडेनन्। उनले क्लबलाई पहिलो पटक यूरोपियन ट्रफी (कन्फ्रेन्स लिग) दिलाए। स्टेडियो ओलम्पिकोमा माउरिन्होले  पहिलो सिजनको सुखद् अन्त्य गरे।

माउरिन्हो रोमाका मसिहाझैं बनेका थिए। यद्यपि खेल शैलीमा केही कमजोरी थिए। जसलाई लिएर बेलाबखत चिन्ता पनि प्रकट गरिन्थ्यो।

पछिल्लो ६ महिनायता भने क्लबका समर्थक चिन्तित बन्न थालेका थिए। कतै माउरिन्हो तेस्रो सिजनमा बर्खास्तीमा त पर्दैनन्! यसअघि उनले जति पनि क्बल सम्हालेका छन्, अधिकतर क्लबमा उनी तेस्रो सिजनमा बर्खास्तीमा परेका छन्। खासगरी सन् २०२३-२४ को सिजनमा रोमामा सबै कुरा ठिक चलिरहेको थिएन, खासगरी पर्दा पछाडि।

सानसिरोमा आइतबारको हारपछि रोमाले पछिल्ला ६ लिग खेलमा केवल एक खेल जितेको थियो। रोमा सिरी ए को अंक तालिकामा नवौं स्थानमा थियो।

यस्तै, अघिल्लो साता मात्रै लाजियोले रोमालाई कोपा इटालियाबाट आउट गराइदिएको थियो। गेजेटा डेलो स्पोर्टले सोमबार लेखेको थियो- क्लब गहिरो संकटमा थियो। पत्रकार, समर्थकले सोध्न थालेका छन्- के अझैपनि रोमाको नेतृत्व गर्न माउरिन्हो सही व्यक्ति हुन्?

मिलानको यात्राभन्दा पहिला नै गाइँगुइँ चल्न थालेको थियो- क्लबका अमेरिकी मालिक द फ्रिडकिन ग्रुप माउरिन्होलाई बर्खास्त गर्ने र क्लबका लिजेन्ड डेनियल डी रोसीलाई कमान्ड सुम्पने तयारीमा छ।

अर्को पनि चर्चा चलेको थियो- मिलानसँगको पराजयपछि माउरिन्होले खेलाडीसँग आफू राजीनामा दिन तयार रहेको बताएका थिए। किनकि उनका कुरा क्लबमा सुन्न छाडिएको थियो। लाजियोसँगको पराजयपछि उनले टिमको बैठक राखेका थिए, जुन बैठक निकै कठोर थियो। बैठकमा केही व्यक्तिहरुको कडा आलोचना गरिएको थियो। उनले केही खेलाडीले पर्याप्त योगदान दिन नसकेको बताएपनि नाम भने लिएनन्। केही खेलाडीले गरिररहेको प्रयासका बारेमा भने उनले खुसी प्रकट गरेका थिए। उनले सिरी ए को शीर्ष चारमा स्थान बनाउन आफूसँग पर्याप्त समय, संशाधन र रणनीति रहेको बताएका थिए।

उनले पटक-पटक आफ्नो टिमको संकट (खासगरी चोट)को विषयमा बोलेका थिए। पाउलो डिबालासँग सम्बन्धित विषयमा बोलेका थिए। उनले टिमका प्रतिभाशाली २१ नम्बरधारी डिबाला बिनाको टिम टिमजस्तो नरहेको स्विकार गरेका थिए।

यस्तोमा केहीले तर्क गर्न सक्छन्- फिटनेसका मामलामा यतिबिघ्न खराब रेकर्ड भएका खेलाडीमाथि अधिक भरोसा राख्नु विनाशको संकेत हो। तर रोमाको कमजोरीबारे माउरिन्हो जानकार थिए। फिटनेसको कमजोरी होस् वा प्रतिभाशाली खेलाडीको कमीका बारे माउरिन्हो भुक्तभोगी हुन्।

उनले अघिल्लो साता मात्रै भनेका थिए- हामी लक्ष्य (च्याम्पियन्स लिग फुटबल)बाट चार अंक मात्रै टाढा छौँ। हामी यसबारे कुरा गर्दैनौँ। बरु जो कोहीले यसलाई असम्भव भनिरहेका छन्। जब तपाईँले ती टिमको क्षमता हेर्नुहुन्छ, जो वास्तवमा शिर्ष चारमा रहन चाहान्छन्, तब हाम्रो तुलाना  हामीसँग गर्न सक्नुहुन्न। तर यो रोमा हो। रोमाका जस्ता अविश्वसनीय समर्थक मैले देखेको छैन। उनीहरुले मलाई जोसे ह्यारी पोटर माउरिन्हो भन्छन्, न कि जोसे माउरिन्हो फेलिक्स।

माउरिन्होले रोमा चोटबाट नराम्रोसँग थलिएको तर्क गरेका थिए। उनको यो तर्क निःसन्देह सत्य थियो। मिलानविरुद्धको खेलमा ९ खेलाडी चोटबाट थलिएका थिए। उनले यो तर्क पनि गरेका थिए- रोमा म्यानचेस्टर सिटी वा चेल्सीको जस्तो खेलाडीमा पैसा खर्च गर्न सक्ने स्थितिमा छैन। उनको यो तर्क पनि सत्य हो।

यद्यपि सिरी ए का अन्य टिमले कम खर्च गरेपनि राम्रो प्रदर्शन गरिरहेका छन्। जस्तैः फियोरेन्टिना, लाजियो, बोलोग्न र एटलान्टा। यी टोलीले रोमाको भन्दा धेरै अंक जोडेका छन्। र यो सिजन रोमाले २० खेल खेल्दा इतिहासकै दोस्रो कम अंक जोडेको छ। सन् २००२-०३ को सिजनमा २० खेल खेलेर सबैभन्दा कम  २७ अंक जोडेको रोमाले चालू सिजनमा समान खेल खेलेर २९ अंक जोडेको छ।

फ्रिडकिन ग्रुपसँग माउरिन्होलाई बर्खास्त गर्ने अधिकार थियो। आश्चर्यको कुरा के छ भने उनीहरुले आफ्नो नाजुक आर्थिक स्थितीलाई हेरेर यस्तो गरेको भन्दा पनि तत्काल उत्पन्न भएको परिस्थतिका कारण उप‍युक्त निर्णय लिएको बताइरहेका छन्।

निःसन्देश, रोमामा उत्पन्न समस्याको पूर्णजिम्मेवार माउरिन्होलाई ठहर्‍याउन मिल्दैन। टियागो पिन्टोले पनि अर्को महिना देखि क्लब छाड्दैछन्। खेल निर्देशक पिन्टोले क्लब छोड्न लागेको खबरले समर्थकलाई पनि दुःखी बनाइदिएको छ। उनले तीन वर्षको कार्यकालमा ट्रान्सफर मार्केटमा गज्जबको काम गरेका छन्। उनले डिबालादेखि लुकाकुसम्मलाई क्लबमा भित्र्याएका थिए।

रोमाले प्रशिक्षक फेर्ने निर्णय लिइसकेको छ। इतिहासको पहिलो यूरोपियन ट्रफी जिताएका र यूरोपा लिगको फाइनलसम्म टोलीलाई पुर्‍याएका प्रशिक्षक बर्खास्तीमा परेका छन्। यस्तोमा समर्थकमा निराशा छाउनुपर्ने हो। तर, खराब फुटबल, खराब परिणाम र टचलाइनमा बेलाबखतमा देखिने गरेका खराब आचरणका कारण माउरिन्होप्रतिको सहानुभूतिको कमी देखिएको थियो। केहीले टिप्पणी गर्छन्- माउरिन्होले रेफ्री र विपक्षी टिमसँग झगडा गर्ने समय र ऊर्जा टिम निर्माणमा लगाउनुपर्ने थियो, त्यसो गरेनन्।

-एजेन्सीको सहयोगमा