प्रचण्डले हटाए सचिवालयका १३ कर्मचारी

काठमाडौँ- प्रधानमन्त्री पुष्पकमल दाहाल प्रचण्डले स्वकीय सचिवालयका १३ जना कर्मचारी हटाइएका छन्। १ माघदेखि लागू हुने गरी प्रचण्डले आफ्नो स्वकीय सचिवालयका एक स्वकीय सहसचिव, ४ जना स्वकीय उपसचिव, एक स्वकीय शाखा अधिकृत, २ जना प्रशासन सहायक, २ जना कम्प्युटर सहायक र २ जना हलुका सवारी चालक हटाएका हुन्।

प्रधामनन्त्रीका प्रमुख स्वकीय सचिव सन्तु दरैकाअनुसार १३ जनालाई एक वर्षको योगदानको लागि धन्यवादसहित बिदा गरिएको हो।

स्वकीय उपसचिवहरु रमेशप्रसाद गुरागाईं, ओमकुमारी पौडेल, सावित्रीकुमारी अधिकारी र कलबहादुर नाथ बिदा भएका छन्। स्वकीय शाखा अधिकृत लाले कुमाल, प्रशासन सहायकद्वय युवराज शाह र रामलाल पराजुली हटाइएका कर्मचारीमा परेका छन्।

कम्प्युटर सहायक वासुदेव शर्मा, खड्क योगी र कार्यालय सहयोगी अविनाश वाइवा, चालक रमेशप्रसाद घिमिरे पवित्रबहादुर शाही पनि सचिवालयबाट हटेका छन्।

‘प्रधामनन्त्री कार्यालयको सचिवसहित विभिन्न पदको दरबन्दी कटौती गरेर चुस्त बनाउने क्रममा सचिवालयमा पनि कटौती गरिएको हो,’ प्रमुख स्वकीय सचिव दरैको दाबी छ। १३ जना बिदाइ भएपनि सचिवालयका अत्यावश्यक ठाउँमा केही जनशक्ति पनि ल्याइने उनले बताए।

सचिवालयमा राष्ट्रिय समाचार समितिबाट हरि लामिछानेलाई लगिएको छ । प्रधामनन्त्रीले अर्थ मामिलाका सल्लाहकार पनि सचिवालयमा थप्न सक्ने अधिकारीहरु बताउँछन् । अहिलेसम्म प्रधामनन्त्रीको स्वीकय सचिवालयमा ३५ जना नियुक्त भएर कार्यरत थिए ।