गोविन्दराज जोशीले भने- तनहुँका हाम्रा समर्थकले स्वतन्त्र भएर मतदान गरुन्

काठमाडौँ- नेपाली कांग्रेसबाट कारबाहीमा परी फुकुवा पाएका नेता गोविन्दराज जोशीले यसपालि स्वतन्त्र भएर मतदान गर्न आफ्ना समर्थक मतदातालाई आग्रह गरेका छन्। बुधबार एक विज्ञप्ति जारी गर्दै उनले यस्तो आह्वान गरेका हुन्।

‘आगामी वैशाख १० गते सम्पन्न हुने उप-निर्वाचनको सन्दर्भ रहेको छ, यसमा हामीले हाम्रो उम्मेदवार खडा गरेका छैनौँ अर्थात् यो उप निर्वाचनमा हाम्रो कुनै आधिकारिक उम्मेदवार छैन,’ जोशीले जारी गरेको विज्ञप्तिमा उल्लेख छ, ‘तनहुँ जिल्लामा हामीहरू कुनै पनि दल विशेषको सदस्य नभएकोले हामी स्वतन्त्र छौँ र स्वतन्त्र रही रहने छौँ।’

उप-निर्वाचमा आधिकारिक उम्मेदवार नभएता पनि प्रजातन्त्रमा विश्वास गर्ने व्यक्तिले मतदान नगर्नु स्वाभाविक नहुने उनको भनाइ छ। तर मतदान गर्न तनहुँका मतदाता सक्षम भएकोसमेत उल्लेख गरेका छन्। सत्य, न्याय र सामाजिक समृद्धिका लागि आफूहरूको लडाइँ जारी रहेको उनको भनाइ छ।

मंसिर ४ मा सम्पन्न निर्वाचनमा नेपाली कांग्रेसका रामचन्द्र पौडेल निर्वाचित भएका थिए। उनी राष्ट्रपति भएपछि आगामी वैशाख १० मा हुन लागेको उपनिर्वाचनमा कांग्रेसले जोशी समूहको समर्थन खोजेको छ।

कांग्रेसले आफूलाई विगतमा कारबाही गरेर राजनीतिक फाइदा हेरिकन यसपालि कारबाही फिर्ता लिएको, कारबाही फिर्ता लिँदा आफूसँग कुनै सल्लाह नगरेको भन्दै जोशी असन्तुष्ट छन्। जोशीले काङ्ग्रेसका प्रतिनिधिले आफूसँग कुराकानी गरेपनि अलमल्याउने र आलटाल गर्ने प्रयत्न मात्र गरेको समेत आरोप लगाएका छन्। उनले काङ्ग्रेससँग यस चरणको वार्ता समाप्त भएको घोषणासमेत गरेका छन्।