घुस माग्ने ढाकालाई हटाएर बिन्दबासिनीलाई सांसद बनाउन रास्वपाको सिफारिस

काठमाडौँ- राष्ट्रिय स्वतन्त्र पार्टीले प्रतिनिधि सभा सदस्य ढाकाकुमार श्रेष्ठलाई‍ साधारण सदस्यसमेत नरहने गरी कारबाही गरेको छ। बुधबार बसेको पार्टी केन्द्रीय समिति बैठकले ढाकालाई सांसदबाट समेत हटाएर बिन्दबासिनी कंसाकारलाई सांसद बनाउन सिफासिस समेत गरेको छ।

अनुशासन तथा आचरण समितिको सिफारिसअनुसार विधानविपरीत काम गरेको आरोपमा ढाकालाई साधारण सदस्यसमेत नरहने गरी कारबाही गर्ने निर्णय केन्द्रीय समितिको बैठकले गरेको पार्टी सभापति रवि लामिछानेले जानकारी दिए। ढाकाको स्थानमा कंसाकारलाई सांसद बनाउन निर्वाचन आयोगलाई सिफारिस गर्ने निर्णयसमेत भएको उनले जानकारी दिए। ढाका समानुपातिक सांसद थिए।

मेडिकल व्यवसायी दुर्गा प्रसाईसँग ढाकाले अढाई करोड घुस रकम माग गरेका थिए। उनले उक्त रकम मन्त्री बन्नका लागि पार्टीको कोर टिमलाई दिनुपर्ने समेत प्रसाईसँग भनेका थिए। तर कोर टिमका विषयमा भने रास्वपाले कुनै निर्णय गरेको छ। उता ढाकाले भने आफूलाई कारबाही गरिए कोर टिम पनि सार्वजनिक गरिदिने भन्दै अनुशासन समितिलाई दिएको बयानमा उल्लेख गरेका थिए। बुधबार पार्टी कार्यालय पुगेका ढाकाले जनवरीको अडियो ल्याएर आफूलाई फसाइएकाले अब अदालतबाट क्लिन चिट लिएर आउने दाबी गरेका थिए।

ढाकाले भनेको कोर टिमबारे छानबिन गर्न सरकारका सम्बन्धित निकायलाई सहयोग गर्ने रविको प्रतिबद्धता छ। ‘उहाँले कोर टिम भन्नुभएको छ। त्यसमा को हो भनेर अनुसन्धान गर्न नै हामीलाई कुनै आधार भएन,’ बैठकपछि पत्रकार सम्मेलनमा सभापति लामिछानेले भने, ‘बरु यसबारे सरकारका सम्बन्धित निकायले छानबिन गरिदिए त्यसका लागि हामी सहयोग गर्छौं।’