संघीय संसदका ८ समितिको बैठक बस्दै, यी हुन् छलफलका विषय

काठमाडौँ– मंगलबार संघीय संसद अन्तर्गतका ८ वटा संसदीय समितिको बैठक बस्दैछ। प्रतिनिधिसभा अन्तर्गतका ४ र राष्ट्रिय सभा अन्तर्गतका ४ वटा समितिको बैठक बस्न लागेको हो।

बिहान ११ बजे बस्ने महिला तथा सामाजिक मामिला समितिको बैठकमा समितिको बैठकमा आ.व २०७९/८० को वार्षिक प्रतिवेदनमाथि छलफल हुने तयारी छ। ११ बजे नै शिक्षा, स्वास्थ्य तथा सूचना प्रविधि समितिको बैठकमा सुरक्षण मुद्रण विधेयकबारे छलफल हुनेछ।

बिहान साढे ११ बजे उद्योग तथा वाणिज्य र श्रम तथा उपभोक्ता हित समितिको बैठक बस्दै छ। बैठकमा झापा, सुनसरी र मोरङमा गरिएको अनुगमन सम्बन्धी प्रतिवेदन, २०८० (मस्यौदामाथि) पेश तथा छलफल हुने कार्यसूची छ।

दिउँसो १ बजे बस्ने राज्य व्यवस्था तथा सुशासन समितिको बैठकमा अनुगमन तथा मूल्याङ्कन सम्बन्धमा व्यवस्था गर्न बनेको विधेयक सम्बन्धमा छलफल हुनेछ।

राष्ट्रिय सभा अन्तर्गतको बिहान ११ बजे दिगो विकास तथा सुशासन समितिको बैठकमा नागढुंगा सुरुङमार्ग निर्माणको हालसम्मको प्रगतिको सम्बन्धमा छलफल हुनेछ।

बिहान ११ बजे नै बस्ने विधायन व्यवस्थापन समितिको बैठकमा स्थानीय तहको कानुन निर्माण प्रक्रियाबारे अध्ययनको मस्यौदामा छलफल हुनेछ।

बिहान १० बजे बस्ने प्रत्यायोजित व्यवस्थापन तथा सरकारी आश्वासन समितिको बैठकमा खानेपानी मन्त्रालयसँग सम्बन्धित प्रत्यायोजित विधायन र सरकारी आश्वासन कार्यान्वयन सम्बन्धमा छलफल हुन लागेको छ।

दिउँसो १ बजे बस्ने राष्ट्रिय सरोकार तथा समन्वय समितिको बैठकमा सोह्रौं पञ्चवर्षीय योजनामा दिगो विकास लक्ष्य तथा लैङ्गिक मैत्री दृष्टिकोणबाट निर्माण गर्न समावेश गर्नुपर्ने सुझावहरूका सम्बन्धमा छलफल हुने संघीय संसदले जानकारी दिएको छ।

दुवै सदनको आगामी बैठक भने माघ २४ गते बस्दैछ। राष्ट्रिय सभाको बैठक ११ बजेर १ मिनेटमा सुरु हुनेछ भने प्रतिनिधि सभाको बैठक ११ बजे बस्नेछ।