रुविनाको शतकमा २२८ रनको चुनौती, आठौँ विकेट गुमाएर माल्दिभ्सले जोड्यो १० रन

काठमाडौँ- नेपाली टोलीकी प्रमुख महिला खेलाडी रुविना क्षेत्रीको उत्कृष्ट ब्याटिङमा नेपालले एसिसी महिला प्रिमियर लिग क्रिकेट प्रतियोगितामा माल्दिभ्सलाई जितका लागि २२८ रनको चुनौती दिएको छ।

मलेसियाको क्वालालाम्पुरमा जारी खेलमा टस जितेर पहिला ब्याटिङ रोजेको नेपालले निर्धारित २० ओभरमा चार विकेट गुमाउँदै २२७ रनको योगफल बनायो। नेपालका लागि रुविनाले सर्वाधिक एक सय १८ रनको योगदान दिइन्।

नेपालबाट अन्तर्राष्ट्रिय क्रिकेट खेलमा शतक प्रहार गर्ने पहिलो महिला नेपाली खेलाडी बनिन्। रुविनाले ५४ बलमा शतक पूरा गरेकी हुन्। यसअघि नेपालबाट अन्तर्राष्ट्रिय महिला क्रिकेट खेलमा नेपालकी सीता रानामगरले सर्वाधिक ८२ रन बनाइएकी थिइन्।

खेलमा रुविनाले ५९ बलमा १० चौका र पाँच छक्कासहित अविजित ११८ रन बनाएको हो।

त्यसैगरी नेपालका लागि पूजा महतोले ५९ रनको योगदान गरिन्। उनले ३६ बलमा पाँच चौका र एक छक्काको मद्दतमा अविजित ५९ रन बनाएको थियो। त्यस्तै सीता रानामगरले १५ रन जोड्दा कविता कुवँले १३ रन बनाइन्।

बलिङतर्फ माल्दिभ्सकी शम्मा अलीले सर्वाधिक तीन विकेट लिइन् भने नब्बा नासिमले एक विकेट लिइन्।

जारी खेलमा माल्दिभ्सले १०.२ ओभरमा नै आठौँ विकेट पनि गुमाएर जम्मा १० रन जोडेको छ। नब्बा नसीमले २२ बल खेलेर २ रन जोडिन्। सुमया बिन्थ अब्दुलले ६ बलमा ५ रन जोडिन्। यस्तै लत्सा हालीमाथले १ रन मात्र जोडेकी छन्।

माल्दिभ्सकी लीन लुथुफीले १० बल खेलेर ० रन जोडिन्। यस्तै फातिमाथ मल्हा, माहा नसीर, फातिमाथ अनाल र आइसाथ मीसा पनि शून्य रनमा नै आउट भए।