महिला टी २० क्रिकेटमा नेपालको शानदार जित, माल्दिभ्स २१४ रनले पराजित

काठमाडौँ- एसीसी वुमन्स प्रिमियर कपमा नेपालले शानदार जित निकालेको छ। नेपालका दुई ब्याटर रुविना क्षेत्री र पूजा महतो चम्किएको खेलमा नेपालले माल्दिभ्सलाई २१४ रनले पराजित गरेकाे हो। जितका लागि २२८ रनको लक्ष्य पछ्याएको माल्दिभ्स १३ रनमै अल आउट भएपछि नेपालले २१४ रनको कीर्तिमानी जित हात पारेको हो ।

माल्दिभ्स १३.५ ओभरमा १३ रनमा अल आउट भयो। माल्दिभ्सकी सुमाया अहमदले सर्वाधिक ५ रन बनाइन्। माल्दिभ्सका ६ खेलाडी शून्यमा आउट भएका थिए।

पहिले ब्याटिङ गरेको नेपालले  निर्धारित २० ओभरमा चार विकेट गुमाउँदै २२७ रनको योगफल बनाएको थियो। नेपालका लागि रुविनाले सर्वाधिक एक सय १८ रनको योगदान दिइन्। नेपालबाट अन्तर्राष्ट्रिय क्रिकेट खेलमा शतक प्रहार गर्ने पहिलो महिला नेपाली खेलाडी बनिन्। रुविनाले ५४ बलमा शतक पूरा गरेकी हुन्।

यसअघि नेपालबाट अन्तर्राष्ट्रिय महिला क्रिकेट खेलमा नेपालकी सीता रानामगरले सर्वाधिक ८२ रन बनाइएकी थिइन्। खेलमा रुविनाले ५९ बलमा १० चौका र पाँच छक्कासहित अविजित ११८ रन बनाएको हो। त्यसैगरी नेपालका लागि पूजा महतोले ५९ रनको योगदान गरिन्। उनले ३६ बलमा पाँच चौका र एक छक्काको मद्दतमा अविजित ५९ रन बनाएको थियो।

त्यस्तै सीता रानामगरले १५ रन जोड्दा कविता कुवँले १३ रन बनाइन्। बलिङतर्फ माल्दिभ्सकी शम्मा अलीले सर्वाधिक तीन विकेट लिइन् भने नब्बा नासिमले एक विकेट लिइन्।

यो जितसँगै नेपाल प्रतियोगिताको क्वाटरफाइनलमा पुगेको छ । समूह डी बाट नेपाल अपराजित रहँदै क्वाटरफाइनलमा पुगेको हो । क्वाटरफाइनलमा नेपालले समूह ए को उपविजेता कुवेतसँग खेल्नेछ ।