रवि लामिछानेलाई लक्षित गर्दै केसीले भने–खास्टाले छोपेको बिरालो छिट्टै म्याउ गर्‍यो

काठमाडौं– राष्ट्रिय जनमोर्चाका अध्यक्ष चित्रबहादुर केसीले राष्ट्रिय परिचयपत्रमा नागरिकका तथ्यांक रुजु गर्ने ठेक्का विदेशी कम्पनीलाई दिइएको भन्दै आपत्ति जनाएका छन्। उनले नागरिकका वैयक्तिक र जैविक तथ्यांकमा विदेशी कम्पनी र एजेन्टहरूको पकड भित्राउने गरी कानुनविपरीत ठेक्का लगाउनेलाई कारबाहीको दायरामा ल्याउन माग गरेका हुन् ।

‘राष्ट्रिय परिचयपत्रमा आबद्ध नागरिकका संवेदनशील विवरण रुजु गर्ने संयन्त्र बनाउने पहल भइरोखको बेला हतारमा निजी कम्पनीलाई ठेक्का दिनु आपत्तिजनक छ । एकातिर नागरिकका वैयक्तिक र जैविक तथ्यांकमा विदेशी कम्पनी र एजेन्टहरुले पकड राख्ने र त्यसैमाथि आर्थिक कारोबार गर्ने विषय अस्वीकार्य छ,’ केसीले भने, ‘ठेक्का दिँदा विधि विधानले तोकेको मापदण्डविपरीत ७ दिनको बोलपत्र गरेर ठेक्का दिनु दण्डनीय छ । यसमा केसकानुनी सम्परीक्षणमा ल्याउनुपर्छ,’ प्रतिनिधिसभाको आइतबारको बैठकमा बोल्दै केसीले भने, ‘पुराना पार्टीहरुले गल्ती कमजोरी गरे, स्वार्थअनुसार नियम कानुन बनाउँथे । नयाँ आएका पार्टीले नयाँ चीज ल्याउने भए भनेर नेपाली जनता मख्ख भएर हेरिरहेका थिए,’ केसीले अघि भने, ‘खास्टाले छोपेको बिरालो छिट्टै म्याउ गर्‍यो, यो विषयलाई त्यसै छोड्न मिल्दैन ।’